Action Star Nag iistar Sa Dugcal

An Barangay Dugcal, sa Banwaan nin Camaligan, iyo an masuerteng lugar na pinag iistaran nin sarong guapitong actor sa pelikulang Pilipino kan panahon pa ni FPJ asin ni Dolphy. An actor mayong iba kundi si Jerry Maniquiz, 60 anyos, halangkaw, matipuno asin may lahing kastila an saiyang mga magurang. Nagdakula si Jerry na sarong Manilenio sa familya nin mga mayaman duman sa Manila. Alagad arog kan ibang aki nin may kaya sa buhay, na minsan nababangkag sa mga barkada kaya inagihan kaini an buhay nin “easy-go-lucky”. Kaya mas pinili ni Jerry an mabuhay na suway sa istriktong magurang asin mga professional na mga tugang. An pinaka premirong trabaho ni Jerry iyo an mag bugkos nin mga bagong imprentahon na mga komiks arog kan Hiwaga, Pinoy Klasiks, Lagim, Liwayway asin Bulaklak. An saiyang Boss mayong iba kundi an premyadong Writer asin Movie Director na si Pablo S. Gomez. Kan panahon na idto, si Pablo S. Gomez iyo an parasurat nin mga nobela sa Komiks na kadaklan mga istorya nin mga inaapi alagad naghihiganti arog ni FPJ. Si Pablo Gomez iyo an nag susurat kan mga pelikula ni Fernando mala ta nahihiling pa ni Jerry si Gomez na haros inaabot nin Matanga sa pag makinilya kan nobela. Tandang tanda pa ni Jerry an mga bulto-bultong komiks na saiyang pig eempake tanganing ipadara nin paktora sa PNR pasiring sa Bicol. Tanda niya an tindahan na De la Rosa Newstand sa sirong kan Supermarket iyo an saiyang pig papadarahan kan komiks kada simana. Sa negocio sa komiks asin sa pag surat nin nobela para ki FPJ iyo an naging dalan tanganing maging marhay an buhay ni Pablo S. Gomez. Si Jerry an pinaka paboritong empleado ni Gomez kun kaya afuera sa pag paktora nin mga komiks, ilinaog si Jerry nin sarong artista sa pelikula. An premirong pelikula ni Jerry iguang titulong “ Danny Boy”, istorya nin mistesong lalaki, na hinahangaan nin mga kolehiala alagad matibay sa buntolan. Arog kan istorya ni Gabby Casimero, naka ibahan ni Jerry sa mga pelikula si FPJ, Erap, Jun Aristorenas asin dakul pang iba. Saro sa padangat niyang artista sa pelikula iyo si Etang Discher ( real name Enriqueta “Etang” Discher Grau, ina kan komedyanteng si Panchito Alba) ta maski ngani pusikit na traydora sa pelikula alagad si Etang maboot ki Jerry. Saro sa mga pelikula ni Etang Discher iyo na ini, naglalakaw sa Avenida asin siya pig abangan ni Jerry na sarong “ snatcher”, duman pig hablot ni Jerry an bag ni Etang, sagkod na nakipag buntolan si Jerry sa bidang actor. Naging ordinaryo para ki Jerry an mabuhay na kadukot dukot nin siko an mga artista sa natad kan Sampaguita Pictures asin sa opisina ni Pablo S. Gomez na yaon sa Balete Drive sa Quezon City. Saro sa dahilan kaya napadpad si Jerry sa Naga City ta parati niya nahihiling sa mga kargamento nin komiks iyo an Naga City lalo na kun pig hahapot siya ni Boss Pablo kun naipadara na sa PNR an mga komiks na kun sain yaon an mga istorya ni Pablo S. Gomez. Maski ngani P500 kada simana an saiyang sueldo ki Gomez, ini bastante na sa sarong soltero na mayo pa nin familya, dahil sa koneksyon niya sa mga sikat na artista, naka pag biyahe na si Jerry sa America, Japan asin Hongkong. Sa pag lagas kan mga dahon kan kalindaryo, nabuhay si Jerry nin sarong pobreng lalaki, dai na bagay sa mga night club asin casino, mayo na an magagayon na elosyon sagkod na namatean niya an maribok asin masibot na buhay sa Manila sagkod na pinili kaini na testingon an buhay sa provincia, sa paagi kan Naga City. An aldao na inot siyang naka tungtong sa Naga, iyo man an panahon na pig kokonstruer an SM City. Maski maidad na si Jerry dara kaini an tindog nin sarong artistahon, guapo asin magalang magtaram kaya nagustuhan siya nin sarong bikolana na tubong Presentacion Partido. Sindang duwa igua nin sarong humildeng harong sa Barangay Dugcal sa banwaan nin Camaligan. Para ki Jerry Maniquiz, mayo nang pinaka maogmang lugar sa kinaban kundi iyo an kabikolan ta digdi tuninong siyang nabubuhay na harayo sa mga bisyo asin kapritso. An solamenteng pangitorogan ni Jerry iyo na liwat sindang magka hirilingan kan saiyang mga tugang na an iba yaon sa America, asin an saro pa iyo na mabisita niya si Pablo S. Gomez na an ultimong informacion nagsasabi na ini nag iistar sa Balik Balik sakop kan Sampaloc duman sa Manila.