Actividades sa bantugan na Amang Hinulid, suspendido

Calabanga, Camarines Sur --- An banwaan na ini na pigdadayo nin maabot sa on milyon na devotos an Amang Hinulid sa panahon kan Semana Santa alagad ngunian na taon liwat suspendi an mayor na aktividades religioso para sa ‘‘health and safety’’ kan namamanuan huli kan nagdadanay na pandemya.

Ini an desisyon kan lokal na gobierno sa resulta sa konsultasyon sa gabos na religious organization asin kan simbahan base sa mga pinapasunod na reglamento kan IATF.

Si Alcalde Eduardo ‘‘Ed’’ Severo nagpahayag kaini mantang nagrarani na an semana asin kabale sa suspendido iyo an Cenaculo sa Parokya mantang kun igwa man ibang actividades dapat masunod an ‘‘basic health protocols.’’

An Kapilya ni Amang Hinulid sa barangay Sta Salud, Calabanga na iyo an pigsusunko kan ribo-ribong mga devoto limitado na sa mga tawo mientras bawal an paghaduk asin pagpahid nin panyo envez ‘‘viewing’’ na sana an mangyayari asin suspendido pa an prusesyon.

Ibabawal na an mga paratienda asin yaon an Calabanga Municipal Police Station na iyo an ma-implementar kan direktiva kan LGU, simbahan asin IATF, sabi pa ni Severo.

Si Obispo Rolando Tria Tirona kan Archidocesis nin Caceres nagpaluwas na nin Circular No. 003 serye kan 2021, listahan kan general guidelines sa Domingo de Ramos, Lunes, Martes asin Miercules kan Semana Santa; Juevez santo, Viernes santo, Easter Vigil, Easter Sunday, asin celebrasyon kan sacramento.

Mayo na kan tradisyonal na ‘‘Hosanahan’’ na envuelto an mga aki alagad igwa pang pagbendisyon kan palaspas na lunad an Pade sa biseklita na iyo an gagamiton sa paglibot nganing magbendisyon.

Magiging simple na sana an iba pang celebrasyon arog kan prusesyon kan Nazareno asin Dolorosa, lunad sa vehiculo karibay kan prusesyon kan pasos.

An Siete Palabras sa cathedral sa paagi na kan social media mantang an mga Parokya dai na kaipuhan magsadiring Siete Palabras. An imahen ni Hinulid asin Dolorosa ilulunad sa vehiculo nganing ilibot sa Parokya.

An iba pang mga dating actividades cancelado na alagad magiging estricto an simbahan sa health protocols. (DPAureus)