Advance party kan ‘‘laslas gang’’ yaon na sa Naga

Igua nang advance party sa Ciudad nin Naga an grupo kan ‘'laslas gang’’ na hale pa sa ibang lugar mantang nagrarani na an Peñafrancia fiesta.

Ini an pagtubod ni Punong Barangay Efren Nepumoceno kan Barangay San Francisco matapos mabiktima an sarong babae sa may Hinulig sa laog kan San Francisco church na nagreclamo na nilaslas an saiyang bag na may laog nin P21,000 kan pigtutubodan tolong suspek na nag-iiribahan na mga lalaki matapos mag-withdraw siya nin cuarta sa sarong bangko harani sa simbahan. Huri na siyang nakagamiaw na naubos na si cuarta niya sa bag.

Sinabi ni Nepumoceno an insidente nangyari kan Hulyo 21 aga asin an saindang suspek mga dayuhan na advance party huli ta nagrarani an Peñafrancia fiesta na ribo-ribo an piglalaoman na mabisita sa ciudad.

An Barangay San Francisco na yaon sa centro kan ciudad saro sa matawong lugar na orog na kun iguang misa sa simbahan.

An Police Station 1 kan Naga City Police Office nagpapadagos pa sa inbestigasyon kan caso alagad naghahanap pa nin CCTV na harani sa lugar kan insidente nganing mabisto an suspek.

Haros cada panahon nin Peñafrancia fiesta an mga insidente nin snatching asin theft iyo an may halangkaw na caso na pigsosombong sa NCPO.

Laen pa sa dayuhan na mga snatcher an ciudad dinadayo man nin mga guest relation officer (GRO).