AGIT-AGITAN NA TANGGURANGAN

Tigsik ko an gurang na soltero

Nalihisan kan panahon na maconsuelo

Grabe pa man kuta an gologolo

Alagad an natada anas na karkulo!

Tigsik ko man an gurang na daraga

Simba sanang simba mayo man misa

Sigeng pirawpitaw kan duwang mata

Kaherakan mo an kalag niya, awot pa!

Tigsik ko ining si Lolo Ma-L

An feeling pirming huben na huben

Kun nakakahiling nin Daisy sa harden

Minakayaskayas! Dagos nang mina-tumbling!

Kadaklan kan mga gurang tigsik ko man

Kun minsan sobra na man an harang

Pasadpasad na, parong Tiger Balm

Kupos an limugmogan, gusto mong ibarangbang!

Tigsik ko an dakol na kalalakihan

Aw, ano daw na virtud an ataman?

Kan naggurang duminakol an kauragan

Daog pa an sadit na aking itilan!

Tigsik ko an agit-agitan na tanggurangan

Kuluntoy na, malungsi na an hasang

Alagad Kun minaabot an pirilian

Minabaskog! Sige an alimpasay!