Agosto nin Pag-andam

An agrikultura pirmi sanang nasa irarom nin risgo asin katibaadan (risk and uncertainty), mga bagay na mayo kitang kontrol. Ang pagkakaiba kan risgo sa katibaadan, karkulado ini asin suportado nin datos. Ang katibaadan yaon sa dai ta aram kung noarin o ano man ang magiging posibleng resulta.

Treseng bagyo ang hinihiling na posibleng mag-abot ngonian na taon. Ang bagyo malaog sa risgo, ang pagputok bulkan sa katibaadan.

Giromdom pa nindo ang risgo asin katibaadan kan 2020? Kan kita inagihan nin pandemia? Binalikan ko ang sakong surat kan petsa 20 kan bulan na Abril kan taon 2020. Kan naglaog nang sarong bulan ang lockdown dara kan pandemiang Covid-19. Igua akong limang puntong linatag sa sakong blog:

1. Magtanom nin mas dakul asin magpadakul nin kakanon para mabawasan an pagdepende sa merkado asin mabawasan an epekto kan pagbago-bago kan presyo. An sarong pasong tanom na pwedeng kakanon, dakul na an mapapakakan.

2. Responsableng pagkonsumo. An kakulangan pirmi nang katotoohan sa buhay, asin an kultura kan basta na sana pag-apon mas nagpapahiling kan katotoohan na ini ngonyan. Probaran magkua asin/o magbakal nin kun anong sakto asin kinakaipuhan sana.

3. Magbasa asin magsurat nin mas dakul. Mga aktibidad ini na nakakapakusog kan satong isip asin kakayahan sa pag-isip. Gusto kong magtao nin mas dakul na oras para sa mga bagay na ini sa aro-aldaw.

4. Mas magpahalaga asin mas bawasan an pagparapantuyaw Ngonyan na mga aldaw, nanudan kong maging mas mapagpahalaga maski sa mga sadit asin simpleng bagay. An pagkakaigwa nin kakanon asin matatatanom, an paglihis kan aldaw, an uran sa hapon, asin an pakikipag-ulay sa mga kataraid na pamilya.

5. Bawasan an pagtrabaho para mas mabuhay nin orog. An Covid-19 nagpapaabot nin mensahe na an oras buhay asin an buhay oras; kung paano ta ini ginagamit, iyo man kung paano kita nabubuhay.

Aplikable pa man sa ngonian ang listahan o halipot na paghorop-horop. Dai man kaipuhan nin pandemia para ini gibohon gawe sa aro-aldaw. Naisip ko ngani minsan, dai paagihon ang sarong bulan na dai ako nakatanom nin gulay man o nin poon nin prutas o kahoy man. Nalingaw na ako kaining surat ko na anom na taon nang nakaagi.

Ngonian na bulan na Agosto na kinokonsiderar tang “lean” month o pinakamatamlay na bulan kan taon, puede kitang magbalik sa limang bagay sa listahan. Pag laog Setyembre yaon ang fiesta asin madadangog ta liwat ang malipot na boses ni Joe Mari Chan na hudyat na poon na liwat kan nagraraning Pasko. Ang taon sarong siklo (cycle), kumpleto nin kaogmahan, kapongawan, kabarudan asin kasibotan, asin padagos ini maski nakapalibot ang risgo asin katibaadan kan mga bagay.

Kaya nanggad importante na mabuhay kita sa presente, sa lambang momento-sa kada hinangos.

Ang Agosto saro sa doseng bulan kan taon na may treinta y uno dias na maagi sana man maski gurano ini kabagal o maski gurano karikas. Ang adal kan bulan na ini iyo ang balanseng trato kan buhay sa kinaban. Dai man puro-pirmi bastante ang ani.