Agri Party list nanindugan sa candidatura ni VP Robredo

An Agri Party list, na sarong Bicolano Party list nagbiklad na kan saindang panindugan sa mga presidentiable na dapat sumuporta sa candidatura ni Bise Presidente Leni Robredo sa mga dahilan kan saiyang karakter bilang tawo, madaling kaulayon asin sinsero.

Ini an mga pahayag ni retiradong Juez Frank Lobrigo, saro sa mga nominado kan saindang grupo na pa-apat nang termino sa congreso an saindang party list.

Naheheling an saiyang pagmakulog sa kasaraditan sa inaapod na ‘‘laylayan’’, nagsusuporta sa sektor agricultura asin an saiyang pigtutulod na magcrear nin mga programa laban sa pagtios, sabi pa ni Lobrigo.

Suportado kan Agri Party list na dapat an Presidential Commission on Urban Poor, gibohon nang departamento nganing an mga programa bako lang nakatututok sa sinambit na sektor.

Saindang hinagad an pagkakasararo kan mga Bicolano sa pagsuporta ki VP Robredo na sarong garantiya sa pag-progreso asin pag-asenso sa bilog na rehiyon.

Sa isyu sa Rice Tariffication Law (RTL) na pigrereclamo kan mga paraoma na naging causa kan pagparababa kan presyo kan paroy asin an nakikinabang iyo an mga higanteng rice traders mantang sinda pa an nagdidikta kan mahal na presyo kan bagas sa mercado.

An propuesto kan Agri Party list magconducir giraray nin pag-aadal nganing dai man apektado an mga paraoma orog na kun panahon nin aranihan.

An saindang programa dapat maging estable an presyo kan paroy, ilibre an abuno sa paraoma alagad dai sinda pabor na tunawon an RTL mantang an Rice Competitiveness and Enhancement Program nakakatabang sa mga paraoma sa paagi kan mga lokal na gobierno.

An RTL padreno sa senado si Senador Cynthia Villar bilang Chairman kan Committee on Agriculture sa senado asin inaprubaran ni Presidente Rodrigo Duterte an ley kan Febrero 14, 2019 sa tahaw kan pagcontra kan sektor nin paraoma asin opisyales asin empleados kan National Food Authority. (dpa)