top of page

AGRI-Party-list pabor enmiendahan an RTL

Si AGRI-Party-List Congressman Wigberto Lee kabale sa mga lehislador na nagsusuporta sa propuestong pag-enmienda kan Acta Republica 11203 o Rice Tariffication Law (RTL) nganing mapahiwas an benipisyo sa tawo para makabakal nin baratong presyo kan bagas kan National Food Authority sa mercado.


Aprubado sa 19th Congress kan nakaaging semana sa ika-duwang pagbasa sa paagi nin ‘‘voice voting House Bill (HB) 10381’’ tanganing tugoton giraray an NFA na magpabakal nin bagas sa mga mercado.


Sinabi ni Lee prayoridad niya matabangan an paraoma na bakalon kan NFA an inaning paroy na tama sa presyo na dai malulugi asin magsuplay nin bagas an ahencia sa mercado nganing makabakal nin baratong presyo nin bagas an consumedores. Kun ini mangyayari maisisikwal na an opurtonistang negosyante. An nangyayari sa ngunian binabagsak an presyo kan paroy nin paraoma orog na kun panahon nin aranihan.


An RTL tinawan buelo an higanteng mga rice traders sagcod iyo an nagdidikta kan halangkaw na presyo kan bagas sa mercado mantang nagpara-baba si presyo kan paroy nin paraoma.


Huli kan RTL mandato nalang sa NFA an pag-stock nin bagas para sa food security alagad tinutugotan na magluwas nin bagas kun may calamidad.


An propuestong ley mandato sa NFA na magkaigwa nin mga rekisitos sa pagrehistro kan gabos na ‘‘grain warehouse and conduct inspection to ensure compliance with rice quality and supply standard.’’


Mismo si Presidente Ferdinand Marcos Jr. iyo an nag-certificar bilang urhente an propuestong bill sa pag-enmienda kan ley nganing makontrol kan gobierno an mga opurtonistang negosyantes.


Si Senador Cynthia Villar nagpadreno kan bill sa senado sagcod nakalusot asin inaprubaran ni dating Presidente Rodrigo Duterte kan Febrero 2019.


Palay Harvester ginagamit sa mahiwas na kaomahan alagad reclamo kan paraoma kun kasuarin aranihan nagparababa an presyo kan paroy. (dpa)

תגובות


bottom of page