AgriKaakian Project

Dahil nagse-celebrar kita nin Nutrition Month ngonian na Hulyo, orolay kakanon muna kita. Tanda ko sa mga dating kolumn nasabi ko minsan maorolay kita nin kinalas, pero laktawan ta muna ini ta mas bago ang experiencia ko sa saro sa mga paborito kong merienda.

Domingong hapon, bandang alas dos y media, nagpa-Queborac ako sa Bagumbayan Sur para magpangudto, na merienda na padagos ta harani naman sana sa alas tres. Bistado ang bakery asin kakanan padagos sa saindang pancit guisado with lechon kawali asin pamosong pambonete. Nag-order ako kan palabok special ninda, special ta igua man nin lechon. Good for the heart.

Ang kahera kadto, sarong may edad na babae. Haloy naman siya duman sa kakanan, minsan nahihiling Tradisyonal pa ang bakery ta mayo nin cash machine o POS sa lamesa kan kahera, surat sa papel kan order saka calculator ang gamit pag-kuwenta. Kasing suanoy kan saindang mga tinapay saka kakanon.

Toninong ang kakanan, bentilador saka mga boses kan customer.Habang naghahalat ako kan order ko, may sarong customer naglaog, Nadadangog ko ang boses kan kahera sa saindang orolay, birthday kan si customer kan aldaw na ito. Pakaaban-aban nagkanta si kahera nin “Happy birthday”, kinumpleto pati, kaibahan kan greetings na “May you have more birthdays to come, God bless.”

Habang padangadang si sakong order na merindalan, hinapot ko si nag-serve, may libre niyako talagang kanta saka greetings digdi pag birthday? Simbag sako, pag siya po ang naka-schedule na kahera, iyo po, pirmi niya po yan ginigibo.

Ma-consuelong gawe. Napangirit ako sa naobserbaran ko sa kakanan. Naisip ko na sa panahon nin AI (artificial intelligence) may mga bagay na dai man talaga masasakop pag-abot sa kakayahan kan tao. Mayo man talagang makakapantay sa tunay na emosyon hale sa espuerso kan tao.

Totoo yan! Sarong halimbawa pa kaini ang pinakaenot na agri-libro para sa mga kaakian na ngonian man na bulan ipupublikar asin ilulunsar digdi sa Ciudad nin Naga. Sa lindong ini kan AgriKaakian Project.

Ang title kan libro, “Ang Istoria nin Pagtanom asin Pagtalubo ni Annie”, ang istorya surat nin sarong teacher, si Ms. Edlyn Apin asin ang ma-kolor na illustration gibo ni Mr. Ray Ubaldo, sarong visual artist asin pareho sinda nagtatrabaho sa City Agriculture Office (CAgO). Ang design asin layout kan agrilibro mas nag-improve pang maray sa tabang ni Mr. Francesco Lucas, saro man na artist, design expert asin Urban Agri practitioner na aktibong volunteer sa CAgO. Ang saindong lingkod, iyo man ang nag dakit-taramon kan Bicol hale sa Ingles.

Medio huru-halawig si proseso kan pag-gibo kan nasabing libro. Inabot kami nin halos sarong taon poon pag-conceptualize hanggang pag-reproduce kan mga copia. Maogmang mahiling ang espuerso kan kada saro sa bilog na proseso hanggang mahaman ang libro.

Iyo ini ang saro sa mga direksiyon ta ngonian sa sektor kan agrikultura, magpoon sa mga kaakian. Duwang bagay ang matutungkusan kan agri-libro, pagkanuod sa pagbasa asin pagkanuod sa pagtanom asin pagpatalubo nin satong kakanon. Duwang bagay na dai masasalidahan nin AI. Nagpopoon na kita, padikit-dikit sa tamang rikas kan mga bagay.