Agrikultura Kan 70s

Saro sa ipinag oorgulyo ko na sabihon sa mga kaulay ko iyo na ako minsan pang nag escuela man sa Agrikultura, ngonan iyo an CBSUA na yaon diyan sa banwaan nin Pili. An pagka aram kan familya ko, kan sakuyang mga tugang asin mga aki ko na ako, nagtapos nin college asin MBA sa University of Nueva Caceres asin an tinapos kong kurso iyo an Accounting, kung sa bagay, ang mag escuela kaidto sa UNC kadakulang prebilihiyo nin sarong escuela ta an UNC, de kalidad na escuelahan, kadakol nin escuela asin abot Bangui an klase kung kaya maorogmahon an mga escuela. Kami sa Accounting Department, maorogmahon ta samuyang pinag aabangan an mga makakalaog sa Top 10 na Departmental Exam sa linya nin Accounting. Oras na makalaog ika sa Top 10, ika an pag oorolayan sa laog kan Campus. Alagad ako palan minsan pang nag adal man nin halipot na kursong Poultry and Swine Raising sa Agrikultura, asin iyan sa laog sana man nin 6 na bulan kan taon 1970. Kan ako magtapos nin elementarya kan 1969, kaipuhan kong magpundo muna pasiring sa high school dahil sa kapag tiosan kan familya, kun kaya ilinaog ako kan sakuyang ama sa bagong bukasan na Naga City Youth Oppportunity School o vNaciyos kan adminsitrasyon ni Naga City Mayor Vicente P. Sibulo. An Naciyos compuesto nin mga volunteer instructors na an namamahala iyo an Daughters of Mary asin an City Hall nakipag areglo sa Agrikultura na 3 beses sa laog nin sarong simana kaming mga estudyante duman maescuela sa Agricultura. Maogmahon an magescuela sa Agricultura ta libre kami sa mga frutas na nagtuturubo sa campus, kadikit an tawo asin maayahay an doros sa Pili. An samuyang mga maestro iyo sinda Senyor Divinagracia, Maranan asin Lapis. Saro sa natandaan kong pinag aadalan iyo kun papano magtibos o mag kapon nin lalong na manok tanganing ini magdakula na malaman asin dakula. An Agrikultura, iguang dakulang poulty area , kadakol guna an nag sosogok kaya dakulang suplayer nin sogok an agrikultura asin saro sa pig gigibo ko iyo an mag timbang kan rinibong sogok pasiring sa small, medium asin large bago ideliber sa mercado. Kung kami bakante, nagraralakaw kami pasiring sa Naga Airport tanganing magdalan kan pag landing asin pag take off kan eroplano. Saro maipagmamalaki ko na ako nagescuela sa teritoryo kan Pili, iyo an magayonon na tinampo, mayong lubak poon sa Naga abot sa Agrikultura, an lugar kan Concepcion asin Del Rosario marambong an mga kahoy sa gilid kaya mafresko asin mayo nin goromok na trafiko. Minsan nakalipas an mga taon, asin kan ako magpasyar sa Agrikultura, kadakula kan ipinag bago, kadakol na nin mga magagayon na edificio asin kadakol na nin mga estudyantes. Sa kada pag biyahe kan sakuyang familya asin pag mina agi sa CBSUA, pinag iistlorya ko sa sakuyang familya na minsan pa akong naging escuela kan Agrikultura, maogma an mag escuela sa CBSUA.