Agua Viva

“Pinapano ni Ina ang salog para sa fluvial procession.” Iyo ini si sabi kan ka-trabaho ko sa biglang uran kan banguing ito kan nakaaging semana. Nahiling ko sinda sa paborito kong kakanan goto sa Mags.

Iyo ini ang naiisip kan mga deboto asin mga nagse-celebrar kan Peñafrancia fiesta, may koneksyon ang uran sa “pag-sakay” sa pagoda o fluvial procession pabalik sa saiyang “harong”, ang Basiica Minore.

Naoobserbaran man nanggad ang mga mauran na aldaw lalo na sa panahon nin novenario ki Ina, ang aldaw pakatapos kan Traslacion.

Ngonian na taon, naka-voya liwat ako, “sinuerte” na makakapot liwat sa duwang andas, ki Divino Rostro asin ki Ina. Sa may Francia ako pirmi nagsasabat para halawig pa ang ruta asin mas halangkaw ang tsansa makakapot sa andas.

Madaradagom ang panahon kadto, bakong mainit, paborableng maray sa mga voyadores. Enot na beses kong maeksperyensiya na maabutan diklom sa may bandang Colgante habang naglalakaw asin nagsasabay sa dagsa kan tao, nasa may bandang San Francisco na si Ina kan mga oras na ini. Namamate ko na padagos ang liptok na namumuo sa bitis dara kan matarom asin magaspang na usli nin grabitas sa tinampo.

Dakul tao. Bakong imposible ang ocho cientos beinte mil (820,000) na estimate na numero kan tao na nag-atendir kan aldaw na ito.

Balikan ta si komento kan katrabaho ko na pag nag-uuran nagpapapano nin salog na aagihan kan pagoda, tanganing dai ini magsagyad asin dire-direcho sana pasiring sa hawasan. Ang uran bako sana sa pagpapano kan salog kundi hagad asin halat man kan satong mga paraoma na nagpaplanong magtanom. Lalo na ngonian na nasa lindong kita nin El Niño.

Ano man daw nanggad ta kaipuhan iagi sa salog Naga? Anong importancia kan salog?

Nagtaga-saliksik kita nin dikit na oras ngonian na semana, ang salog na igua nin tubig, sarong sagradong lugar segun sa pagtubod ta. Ang tubig simbolo nin buhay.

Saro ang tubig sa mga natural na rekursos nin kinaban na kung mayo ini, mapapatod ang buhay kan gabos na yaon- tinanom, hayop, asin kitang mga tawo. Dai matagal ang tao kung mayo nin tubig sa laog sana nin tolo hanggang limang aldaw. Dai mo na pag-testingon kung totoo ang sinasabi ko ta inadalan na ini.

Sa ibang pananaw, ang tubig simbolo nin paglinig asin pagbagunas nin epiritual na ati o dara dara kan buhay, kaya ang mga deboto na nagdadalan sa gilid kan salog nagpapangadie nin marhay na salud o pagkarahay sa mga kahelangan o mga mate kasabay ang pagwagayway kan putting panyo o tela asin pagsulo nin mga kandila para sa mga kahagadan asin intensyon kan mga pamibi.

Sa kada fiesta na nag-aagi sa buhay ta, nagtatalubo man daw kita sa satong pagtubod? Kita ang makakasimbag kayan. Kita sa kairaruman kan satong mga puso.

May nahiling akong sarong magayon na litrato ni Ina kan siya masiko na sa Francia asin Elias Angeles. Kua ni Winson ang litrato, saro siya sa mga katrabaho ko sa City Hall. Si Ina sa tahaw kan diklom asin dikit na liwanag kan palibot, nasa may bandang likod niya ang simbahan kan San Francisco. Sa tahaw kan dagat nin rinibong deboto.

Sa sakong paghorop-horop sa litratong ito, simple sana man ang mawot kan kada voyador sa Traslacion asin prusisyon sa bisperas nin kapistahan-magdolok ki Ina kaiba ang debosyon ki Divino Rostro. Ispiritwal na eksperyensya ang paglaog sa mahibog na dagsa kan tao para makakapot sa saindang andas dara ang mga pamibi asin mga pasanon nin buhay. Yaon ang konsolasyon asin kagianan.

Maogmang kapistahan sa gabos! Viva La Virgen! Viva El Divino Rostro!