Ako Bicol nagpaapod konsultasyon paraoma

Tanganing matabangan an sektor nin paraoma sa Bicol na mapalangkaw an saindang mga produkto sa agricultura, pinangenotan ni Rep. Elizaldy Co kan Ako Bicol Party List an konsultasyon sa Irrigators Association and Rain-Fed Farmers Group on Large Scale Corn Production for Animal Feed na ginibo sa Theatre, Hotel St. Ellis, Ciudad nin Legazpi kan Deciembre 7.

Nagparticipar an grupo nin paraoma hali sa mga banwaan kan Guinobatan, Oas, Camalig, Polangui, Sto. Domingo, Daraga, ciudades kan Ligao asin Tabaco, gabos kan provincia nin Albay mantang igwa hali sa Camarines Sur, Sorsogon asin Camarines Norte.

An pagtiripon kan grupo bilang inisyatibo ni Rep. Co asin pagiriba sa Ako Bicol Party List nganing mapabaskog an sektor sa lado nin agricultura makakatabang pa sa economia kan rehiyon mantang malangkaw an saindang ingreso.

Laen pa sa paroy pig-enganyar an mga paraoma na magtanum nin mais na pambahog sa ataman na hayop.

Sinabi ni Jake Pineda, staff kan opisina ni Rep. Co mawot mapaasenso kan Ako Bicol an paraoma sa paagi nin bagong teknolohiya na mapalangkaw an saindang produksyon sa paroy asin mais.

Nagpapadagos pa an mga konsultasyon asin propuesto mantang kabali sa mga rekisitos kan Department of Agriculture nganing makumpleto an proyecto, na suportado kan mga paraoma.

Sa programa sa patubig, nakatalaan magtabang an National Irrigation Administration nganing maglangkaw an produksyon sa paroy asin mais.

Konsultasyon sa sektor nin paraoma pinangenotan ni Ako Bicol Party List Rep. Zaldy Co para mapalangkaw an produksyon asin mapaangat an pagbuhay kan paraoma sa Bicol.