top of page

Ako Bikolano, Bikolano ako



Ako Bikolano pero dae tataong magbikol o habong magtaram nin Bikol. Garo yan si Migz Zubiri na Bikolano daa na taga- Libon Albay pero dae man tataong magtaram. Matibay pang mag-Tagalog, matibay pang mag-Cebuano o Bisaya. Matibay magdiskurso kun sa Senado. Nakakaguiromdum lang na taga-Bikol siya kun ma-eleksyon.


Marhay pang si Chiz Escudero talagang tataong magtaram nin Bikol maski ambush interview.


Si Senador Tolentino taga-Guinobatan daa ta an ina Bikolana pero palibhasa taga-Tagaytay City Tagalog man kun magtaram. Si Robin Padilla na an ama taga-CamNorte Tagalog pero sabi niya Bikolano siya. Si Risa Honteveros an depuntong agom Bikolano pero siya Tagala.


Dae baling si Ower Andal na Batanguinyong tara-Tagalog pero tataong magtaram nin Bikol. Calabanga an tuno.


Idtong depuntong Eddie Garcia Bikol na Bikol, Dindo Fernando Bikol na Bikol, Manuel Urbano Conde na sarong national artist purong Bikolano maski taga-Daet. Si Bogs Adornado, Edsel Lagman, Goyo Castilla, Manny Aurius, Johnny de los Santos, Rudy Baldemor, Ervin Borja, Loida Nicolas saka Alfonso Villamora asin iba pa na pigkokokyaw an saindang pagui-guin Bikolano-o Bikolana sa tataramon na Bikolnon.


Habo ko lang idtong naka aradal-adal dikit sa UP o sa Ateneo na masabi na Englison mo ta dae na ako tataong mag-Bikol.


Idtong depuntong Raul Manglapos kan nagkakandidatong para senador o para Presidente maski Ateneo accent nagtataram nin Bikol. Siya an idol ko kaidto.


Pero may mga nag-aradal, nagdarakula asin nag-ereskwela digdi sato pero kan makatungtong sa Manila o sa abroad lingaw na kan sadering tataramon ninda. Englison mo ngaya ta dae na ako tataong mag-Bikol.


Nganing dae malingawan an Bikol na nanudan sa harong tungkusan na marhay sa habay, kaulayon an mga tugang, kapipinsanan, kamidbid sa sadering tataramon. Huwag maguin lawi at baka masungkig sa pungi.


An iba kaya Erenglis sanang Erenglis ta sabi kayan ni Atty. Adan Erenglis pero taraplis.


Mayo man maraot kun gulpi kang aram na tataramon bastang dae mo lingawan an saderi.


Arog ki Jose Rizal apuera kan Espanyol tataong mag-Aleman, tataong mag-Frances, tatao pang mag-English pero dae nalingawan an Tagalog kaya nakasurat siyang magagayon na libro na Noli Me Tangere asin El Filibusterismo. Heroe nasyonal pa.


Haling abroad kun masurat kita pasiring Pilipinas Bikolon ta. Hali digdi sato masurat kita sa kapamilya Bikolon ta.


Dapat ngani an mga parabasa kan Bicol Mail na magsurat sa letters to the editor nin Bikol, magkuntribuir nin column asin iba pang artikulo sa tataramon na Bikol.


Igwa kita nin pig-aapod mother tongue na subject pero dae masupog an paratukdo na gamiton an Bikol.


Saka kun pwede tabi dae pagparaharaluan nin Tagalog asin ibang lenguahe an satuyang sadering tataramon tangarig respetado kita. Kun ma-Bikol mag-Bikol, kun ma-Tagalog mag-Tagalog, kun ma-English mag-English bakong haralo.


Paki-ulay sa mga taga-media sa radyo asin peryodiko pakaraya baya an Bikol nindo ta kun sarala-sala dae na lugod naiintindihan.


Bikolano ako sa isip, sa guibo, sa puso asin ugali.

コメント


bottom of page