Alcalde kan Bato, CSur sinuspende kan Capitolio

An alcalde kan banwaan nin Bato, Camarines Sur na bakong kaalyado kan Capitolio Provincial pigpasa-irarum sa 60 diyas na preventive suspension huli sa inaatubang na caso admnistrativo sa Sangguniang Panlalawigan.

Si Alcalde Domingo Zorilla Jr. (NPC) narecibe na an suspension order na pirmado ni Gobernador Luigi Villafuerte sa rekomendasyon kan junta provincial kasunod kan sinangat na kiha ni Bise Alcalde Vic Ramos (PDP-Laban) asin duwa pang miembros sa Sangguniang Bayan huli kan pagpaarkila kan ika-duwang eskalon kan mercado na mayong contrata.

Alagad magpapadagos pa sa puesto an jefe ejecutivo matapos makasangat tolos siya nin Notice of Appeal sa Malacañan na narecibe alas 10:00 nin aga kan Martes, Mayo 9.

Saiyang sinabi sa press conference kan Martes, Mayo 9, 2022 mantang nakasangat tolos siya nin apelo magpapadagos pa siya sa posisyon bilang alcalde kan saindang banwaan.

Hinahagad niya na magpaluwas nin ‘‘stay order’’ an Office of the President, sabi pa

Inaakusaran an jefe ejecutivo sa pagpaarkila kan ika-duwang eskalon kan mercado sa LCC na mayong contrata.

Alagad saiya ining pinapahimotik huli ta igwa siyang pugol na contrata sa pagpaarkila sa LCC mala ngani notaryado na kan abogado.

An depensang ini sarong pusog na evidencia nganing ibasura an caso administrativo, segun pa sa alcalde.

Nagtutubod an alcalde na politica sana an caso kan saiyang mga contra partido sa sangguniang.

Nanindugan man si bise alcalde Ramos na siya na an acting Mayor sagcod mayo pang pugol na stay order hale sa Malacañan o TRO an suspendidong alcalde. (dpa)