Alcalde kan Caramoan, CS balik sa puesto huli kan ‘‘Stay Order’’

Nakabalik sa puesto si suspendidong Alcalde Marilyn H. Co kan Caramoan, Camarines Sur matapos makakua nin Stay Order hali sa Malacañang petsado Febrero 6, 2024 kasunod kan anom na bulan na suspension sa saiya ni Gobernador Luigi Villafuerte kan Deciembre 4, 2023 huli sa caso administrativo.

Nagrukyaw nin kaogmahan an jefe ejecutivo nganing ipadagos niya an serbisyo sa mga Caramoanon sa atubang kan pinaluwas na Stay of Execution Pending Appeal hali sa Malacañang na pirmado ni Anna Liza G. Logan, Deputy Executive Secretary for Legal Affair.

An abogado kan jefe ejecutivo iyo sinda Marion Eloisa Escueta-Legacion asin Nathaniel Emil E. Legacion.

Sa anom na bulan na suspension sa saiya na nag-epekto kan Deciembre 4, 2023 naconsumo an duwang bulan asin naputol huli kan stay order kan Malcañang.

An jefe ejecutivo kinasohan sa Sangguniang Panlalawigan nin administrativo ni Bise Alcalde Dyan Ramirez kan dai siya patukawon bilang OIC Mayor mantang mayo sa saiyang banwaan an alcalde.

Pinaboran kan SP Camarines Sur an reclamo kan bise alcalde na nagpaluwas nin resolusyon kan Noviembre 2023 asin pig-implementar ni Gobernador Villafuerte kan Deciembre 4, 2024.