ALCALDE KAN IRIGA KINASOHAN SA OMBUDSMAN: Pagmalgastar fondo sascholarship putik-Alfelor

Ciudad nin Iriga --- Harayo sa katutuhanan an akusasyon kan Citizen Crime Watch (CCW) na nagmalgastar nin maabot sa P3 milyon an City Hall para sana sa duwang jovenes na natawan nin scholarship kan City Hall sa saro sanang semestre kan 2018.


Ini an mga pahayag ni Alcalde Madelaine Alfelor kan Ciudad nin Iriga asin inapod niyang gibo-gibo sana asin pangraraot sa saiya na igwang nasa likod na desperadong politico na dai niya man nginaranan.


Andam niyang simbagon an caso sa Ombudsman alagad an saiyang paliwanag nakapangaran an tsikie sa sarong empleado kan City Hall alagad an pambayad sa matricula pigrecibe kan mga ‘‘indigent’’ na kabale sa scholarship program kan LGU na preparado na maging testigos contra sa akusasyon sa saiya.


Si Jigs Magpantay, Chairman kan CCW nagpahayag sa entrevista sa radyo na saiya nang sinangatan nin casong Grave Misconduct and Prejudicial to the Best Interest of the Service sa Ombudsman contra ki Alcalde Alfelor kan Lunes, Deciembre 7.


An documento ni Magpantay hali sa Commission on Audit (COA) report na nagcucuestion kan pagbayad nin duwang Check No. 1045799 asin 110773 kan taon 2018 sa duwa sanang jovenes na igwang cantidad nin maabot sa P2.8 milyon.


Tano ta sa duwa sanang jovenes pag-scholarship dapat an matricula pigbabayad direkta na sa escuelahan o colegio, sabi pa kan CCW.


Pigngaranan ni Magpantay an estudiante alagad empleado kan City Hall na si Mira Nacario na nagrecibe kan tsikie na nagcacantidad nin P1.7 milyon kan 2018 asin kan Oktubre 3, 2018 saro naman na tsikie na kulang-kulang on milyon pesos alagad dai niya paman nginaranan an estudiante.


Sa paliwanag kan alcalde an pigsasabi ni Magpantay na empleado kan City Hall na nagrecibe kan P1.7-M bako siyang estudiante envez iyo sana an sinugo na magdistribuer kan cuarta na pambayad sa matricula kan mga benipisyaro sa scholarship program arog kan ginigibo man ni Gobernador Migz Villafuerte.


Saiya pang sinabi cada school year padagos an scholarship program kan LGU alagad an problema an ibang director kan COA man-iba iba an interpretasyon kan guidelines asin kun pigribayan naman nin bagong director iba na naman an opinion, alagad an saiyang pagpaluwas nin fondo sa scholarship mayong disallowance sa ahencia.


‘‘Kun gusto kan CCW itao sa sainda an magurang asin estudiantes nganing magtestigo na nagrecibe sinda nin cuarta para sa pan-matricula’’.


Natuyawan pa kan jefe ejecutivo an CCW na nagparapaluwas na sa publico kan pagsangat niya nin caso alagad mayo paman ngani nin case number kan Ombudsman, an nangyari na eenot an trial by publicity na pangraraot na tolos an ginigibo. (DPAureus)