Alert level 1 mapauswag sa turismo

Nakakabangon na an economia kan Ciudad nin Naga bako lang sa ngaran na negosyo envez an naglalaog na mga turista na nakatabang digdi an pagbaba na sa alert level 1 sa ciudad asin pagtugot na sa tradisyonal na prusesyon kan mga santo ngunian na maabot na semana santa.

Si Consejal Sonny Rañola, Chairman kan Committee on Tourism sa Sangguniang Panlungsod nagpahayag na naheheling na niya an pag-uswag kan ngaran na turismo asin nakadagdag pa digdi an pig-isyu na Executive Order No. 2022-011 ni Alcalde Nelson Legacion na nagtutugot na kan pagbuelta kan tradisyonal na prusesyon kan mga santo sa maabot na semana santa.

An prusesyon kun panahon kan semana santa pigdadayo nin mga turista mientras dakul an nagpupuruli hale sa abroad asin sa iba pang mga ciudades asin balik na sa 100 percent seating capacity an mga pampasajerong buses, sabi pa ni Rañola.

Nganing matabangan an negosyante, hinale na an curfew hour na dating nagpupuon alas 9:00 nin banggui hasta alas 4:00 nin aga alagad sa mga menor de edad mantenido pa an curfew ordinance.

Segun pa ki Rañola an paghale kan curfew hour makakatabang sa mga establisimiento nganing harahalawig an oras kan naglalaog na parokyano sa sainda siring sa mga mall.

Lakma an dalagan kan negosyo sa laog nin duwang taon na apektado huli kan coronavirus disease.

Ngunian na alert level 1 an ciudad dakul na an mga nagrurulowas na mga tawo asin nagbabalik na sa normal na negosyo asin dakulang tabang para sa employment sa nawaran trabajo huli kan pandemya, segun pa sa consejal.

Si mga tourist spot sa ciudad pigdadayo na asin igwa nang paglangkaw kan tourist arrival base sa report kan Arts, Culture and Tourism Office kan ciudad.

Maging man an Department of Tourism sa Bicol nagtugot na sa paglaog kan mga turista sa rehiyon. (dpa)