Alkaldesa Lim hagad an tabang kan SB kan Goa

Ni Sonny Malate

Goa, Camarines Sur--- Pighurot kan bagong nagtukaw na alkaldesa Raquel S. Lim an dayupot na pagtatarabangan entre kan oficina niya asin kan  Sangguniang Bayan digdi sa pangengenot ni Bise Alkalde Marcel Michael P. Pan.

Durante sa inaugural session kan ika- 29ng Sangguniang Bayan (SB) kan Goa kun saen imbitado an hefe  ehecutibo, nakiulay si Lim sa mga miembros kaini na igilid na muna an politica asin an paurogon an pagserbi para sa karahayan kan mga kahimanwa.

Sa lado kan huben na bise alkalde, ini an nagpahayag na an Sangguniang Bayan bulanos an pagmawot para sa karahayan kan mga constituentes. Siya nagpahayag na  bukas  siya sa idea na mag-urulay-ulay an lado ehecutibo asin lehislatibo  mantang pareho man servicio publico an  mandato sa sainda.

Si Lim dati nang nagtukaw nin sarong termino kan nakaaging mga taon asin  nakabuwelta sa puwesto huli sa kapangganahan niya kan nagtalikod na pirilian. Kairiba niyang nagtrayumpo sa  Team One CamSur  an tolo sanang Municipal Councilor kaya minoriya an saindang  grupo sa local na lehislatibo.

Nagtao si Lim nin asegurasyon sa Sangguniang Bayan na sususteniran  kan saiyang administrasyon an mga marhay na  proyectos asin programang  pinoonan asin pig-implementar kan nagtalikod na administrasyon.

Particular na pigbanggit kan alkaldesa iyo an Goa Community College na iguang bagong edificio na pigpapatugdok sa barangay Tagongtong sa paagi kan fundo gikan sa oficina ni Cong. Arnie B. Fuentebella.

Dagdag pa kaini iyo an mga programa dapit sa salud. Segun ki Lim magkakaiguang mga vehiculo gikan sa Tabang Banwaan na idedestino sa Municipal Infirmary. Ini an maserbing lulunadan kan mga bantay kan patiente digdi mantang ini an may distancia hale sa Centro.

Tanganing maging buwelo an bulos kan trapiko sa Centro, segun ki Lim aasikasohon man an tamang sistema kan pagkarga asin diskarga kan mga vehiculo sa atubangan kan mga tindahan digdi. Sa dakol na beses, ini an causa kan pitsidong espasyo sa lugar na ini.

Mientrastanto, pigbuyagyag kan local na ehecutibo na tututokan  kan oficina niya na mapakinabangan na an haloy nang nakatiwangwang na district hospital sa atubangan kan Goa Integrated Central Terminal (GICT). An estructura nasa bangbangan kan Culasi River asin pighihiling na peligroso orug na kun may bagyo. 

An district hospital anom nang taon na dae nagagamit huli sa isyu dapit sa lugar na namunugtakan kaini. Naglalaom si Lim  na kun  magiging operational na ini masimbag kan pangangaipong medical bako sana kan mga Goaeño kundi bilog na distrito.

Apwera kaini, pigpahayag pa man ni Lim na hihinguwahon niya na macompleto na an mercado publico kan Goa. An enot na kabtang kaini nailatag na asin an kaipuhan iyo an mayor na edificio sa atubangan kan existidong estructura.

Sa presente, an Goa saro nang 1st class municipality, kairiba an apat pang banwa sa cuatro distrito. Ini centro kan edukasyon asin comercio sa bilog na Partido Area asin iguang potential na maging ciudad. 

Naglalaom an mga namamanwaan digdi na  sa actibong pagtatarabangan kan ehecutibo asin lehislatibo kaini,  padagos an estado kan Goa bilang centro kan progreso sa bilog na Partido Area.