Ama pinagtataga gadan kan saiyang aking lalaki

Matapos kan insidente sa Ciudad nin Naga na sarong esposa tinaga gadan kan saiyang esposo sa Barangay Mabolo, sinimbag an makangirat na krimen sa Sagñay, Camarines Sur kan an sarong ama pinagtataga gadan kan saiyang aking lalaki.

Sa imbetigasyon kan Municipal Police Station sa banwaan nin Sagñay, an biktima pigmidbid na Jerry Clerigo y Montañez, 54 anyos, may agom asin residente kan Sitio Dolom, Barangay Kilomaon kan kaparejong banwaan.

An insidente nangyari maagahon kan Lunes, Hunyo 5 mientras na an suspechado pigngaranan kan MPS na si Jessie Clerigo y Velasquez, 26 anyos, may kasaruan asin residente kan sinambit na barangay. Sinabi pa na nagkaigwa nin mainit na diskusyonan an mag-ama mantang nakainom nin arak an suspechado sagcod na pinagtataga nin nagkaperang veces na tolos binawian buhay.

An suspek nagsuko man sana sa MPS kan Sagñay asin sinangatan na nin caso sa corte.

Namumundo an familia asin partidaryos sa sinambit na krimen huli ta aki man sana an naggadan sa saiyang ama.

Si nangyari sa barangay Mabolo, Ciudad nin Naga an suspek nag-uusar nin ilegal na droga mantang si insidente sa Sagñay an suspek nakainom nin arak.