AMANG HINULID: Iluluwas sa kapilya para sa motorcade procession

Iluluwas na sa kapilya an Amang Hinulid sa barangay Sta Salud, Calabanga, Camarines Sur sa maabot na Viernes Santo alagad sa paagi nin motorcade procession sa mga mayor na kalye matapos kan duwang taon na mayong actividades huli kan pandemya.


Alagad itutugot sana an penitential walk kan mga deboto hale sa manlaen-laen na banwaan kan Camarines Sur sundo sa Kapilya sa barangay Sta. Salud.


Ini an ipapasunod kan local IATF kan Calabanga, Camarines Sur mantang an banwaan na ini nasa alert level 2 dai pa narealisar si paglaom na ibababa na ngunian na Abril 1-15 kan national IATF an saindang klasipikasyon sa alert level 1.


Si Alcalde Eduardo Severo nagpahayag ini an saindang desisyon kan LGU sa konsultasyon sa Simbahan, Hinulid Council, Municipal Police Station, Municipal Disaster Risk Reduction Management Office asin iba pang ahencia.


Sa Jueves asin Viernes santo an iba pang mga santo na maparticipar sa prusesyon mangyayari na ngunian na semana santa alagad parejo man sa paagi kan motorcade procession. Igwa sanang nakaantabay na limitadong vehiculos na debotos kan mga santo, sabi pa kan alcalde.


Alagad sagcod sana sa 60 vehiculo an tutugotan na magparticipar sa prusesyon na maagi sa mga mayor na kalye kan centro kan banwaan.


Dapat masunod giraray an health and safety protocols sa mga actividades sa Amang Hinulid.


Sinabi ni Severo kan dai pang pandemya inaabot nin on milyon an nasungkong mga deboto asin turista sa melagrosong Amang Hinulid.


Nakatalaan pang ipasunod na dapat si Hinulid barang sa may tinampo mientras na bawal na an paghadok asin pagkapot sa bitis envez an gigibohon kan mga masungko mababay na sana kan kamot sa pagagi sa Amang Hinulid.


An kalabaan kan tinampo sa barangay Sta. Salud asin barangay San Miguel sarado sa trafico nganing buelo an penitential walk kan mga deboto.


Sa Municipal Police Station, naghagad na nin augmentation force sa PNP Provincial Office nganing maging katuwang sa pagmantenir kan paz y orden sa semana santa sa banwaan na ini.


Igwa nang koordinasyon an mga MPS hale sa Naga City Police Office, Canaman, Magarao asin Canaman na kabale sa tatawan seguridad kan pulisya an mga ma-penitential walk.


Dinagdag pa kan jefe ejecutivo na ngunian na Viernes, Abril 8 liwat na maurulay an local IATF para sa pinal na plano na iimplementar sa maabot na semana santa. (DPAureus)