AMBAG SA ADMINISTRASYON NI ROBREDO: CMAE mumuknaon sa Ciudad nin Naga

Sarong movimiento an nakatalaan bilogon sa Ciudad nin Naga nganing pakusogon an kampanya sa kapalibotan asin agricultura.

An grupo iyo an Citizen Movement for Agriculture and Environment (CMAE) asin sa ngunian nagkapera nang miembros an naghihiro hale sa manlaen-laen na sektores.

Si dating Consejal Julian Lavadia Jr., consultant kan City Agriculture Office (Cago) nagkumfirmar na saro siya sa nagtutulod kan mumuknaon na NGO komo ambag sa bagong administrasyon ni incoming Mayor Atty. Leni Robredo.

An saindang objetivo siring kan mga advocacia sa pagpa-uswag sa lado nin agricultura bako lang mapalangkaw an produksyon envez makatabang sa organikong pag-oma labanan an mga ilegal na pagkumbertir kan mga omahan sa industrial huli ta iguang nangyayari sa ngunian apesar na kumpleto sa patubig an kaomahan alagad marikas na aaprubaran kan Department of Agrarian Reform an conversion nganing gibohon industrial. An nangyayari kaini, nababa an produksyon sa agricultura kun dai masasaway an DAR apesar na cuestionable an saindang desisyon.

Sa lado nin ‘‘Environment’’ itutulod an mga advocacia sa kalinigan kan salog Naga, sobrang pollution sa centro kan ciudad huli ta dakul na mga vehiculo an nagbubuga nin sobrang maitum na aso na makaka-apektar sa salod kan publico asin iba pa.