AMORITIS

Tigsik ko an makulit na si Sabel

Tsikiting pa, sobra an kubilkubil

Kan an pagal na nanay napundir

Linada an ngabil, naggarabing!

Tigsik ko an daragang garong lansadera

Kun banggi, daeng ontok an rampa

Minapailawod, minapairaya

Nagbutog an tulak, naengkanto daa!

Tigsik ko an babayeng mahisdol

Sobra an taririk, gatak an bool

Sige an gala, wagas kun mag-inom

Nagbados, tinuwadan kan kailusyon!

Si Kikay na katabang tigsik ko man

Aw hadaw ta kinagat kan ukay

Imbis mag-agrangay, nagpirawpitaw

Kinilig, nag-itaas an alinawnaw!

Tigsik ko man po si Martabana

Dati daw  seksihon  na daraga

Kinamotkamot an tilapia sa kusina

Sus, nanagin losyang na balyena!

Tigsik ko si Corazon sobrang namoot

Kan nahinog an ponggod sa angog

Nagkayaskayas, suminakat sa lanob

Nagrampahog sa daga, nakaaratot!