An Dalagan Kan Buhay

Pag higda ko kasubangi ta oras na mag turog, bigla ko na lang na isip asin na gamiyawan na marikason an buhay asin dalagan kan panahon.

Sarong semana pa lang naka agi, na gadan an saro sa mga pinsan ko na si Maria Rosario “Ching” Ojeda–Legarda. Aki si Ching kan si matuang tugang (Antonio Ojeda) kan sakuyang ina na namundag asin nag dakula sa Naga.

Dae pa ngani sarong semana an naka agi nagadan man si matuang tugang kan sakuyang agom. Flor Dionisio-Adriano an pangaran niya. Saro siyang debotong Kristyano.

Kan Abril 3, 2024 nag paaram sa kinaban na ini an saro kong padangat na pinsan na si Nilo P. Aureus. Aki si Nilo ni Tomas Aureus na tugang kan sakuyang ama na si Mariano.

Saro sa pinaka mamundong aldaw sakuya an sunod na nangyari kan Abril 23, 2024 – nag paaram si matua ming tugang na si Carlos na aki kan samuyang ina asin ama na sina Teresing asin Marianing. Dae pa nahahali an pagka pungaw ko ki Carlos.

Huna ko mayo nang masunod pero bigla na naman ini sinundan kan Mayo 14, 2024 sa pag paaram kan saro na naman na padangat na pinsan na si Leon “Jun” Aureus. Aki si Jun kan si primerong alcalde kan Naga na si Leon Sa. Aureus.

Mag turugang an mga ama mi na sina Tomas, Mariano, asin Leon.

Madali na naman an Krismas. Dae ko na madadangog an boses ni Jun Aureus kada Krismas. Dae pa siya nag falta sa pag apod sakuya igdi sa NY hali sa Canada kada Krismas. Sa sementerio ko na lang siya sa Canada mabibisita sa pag pasyar mi otro duman. Dae na kompleto an pag bibisita mi duman kun mayo si Jun.

Madali na naman an Krismas. Mas mapungaw ngunian na Krismas ta dae ko na permanenteng madadangog an tugang kong si Caloy.

Pero malinaw pang marhay sa isip ko si mga nanudan ko saiya pag abot sa mga ulay ulay mi manungod sa buhay, pagtubod sa Dios, mga nangyayari manungod sa kinaban, siensya, literatura, budismo, mga ibang relihyon, asin dakul pang iba…

Madali na naman an Krismas. Dae man lang ako makaka padara maski dikit na regalo pang Krismas para kay Nilo. Dakulang tabang an na ginibo niya sakuya.

Dios Mabalos otro Nilo sa saimong maboot na pag tabang asin pag trato samuya. Marhay kang tawo asin dae ka malilingawan kan mga taga Naga.

Sa pag suma, ining mga tawong ini na sakuyang nasambitan permanenteng dae na makaka attender sa mga tiripon tipon pag Krismas. Bakante na an mga paborito nindang tukawan sa mga harong ninda. Siring man sa mga pwesto ninda sa lamesa.

Pag abot sa media noche medyo may kulang na pirmi. Iba na an orosipon pag abot kan karakanan.

Sa sarong pag hiling siempre iba na an dalagan kan pag buhay buhay kun mayo na sinda sa buhay ta.

Napupungaw kita ta mayo na sinda.

Pero dae ako siguradong marhay na miss man kita ninda.

Garo siribot sibot sinda sa dae ta masukol na kaugmahan sa langit kairiba an satuyang Kagurangnan, nag kakarantahan kairiba si mga naka aging namumutan sa buhay, mga depuntong magurang, mga anghel, asin mga santo.

Sa sarong pag taram, naka puli na sinda duman sa tunay nindang harong - An Pinaka Maogmang Lugar.

Merry Krismas po saindo.