An Inuman ni Paquito



Sarong lumang harong sa Sabang Calabanga, iguang mafreskong balkonahe na iyo ngonian an kahadean ni Tyo Roming Alias Romeo Vasquez, dating jeepney driver sa biyaheng Naga asin Calabanga. Si Tyo Roming, maogmahon na gurang, kaiba an saiyang familya asin mga makuapo asin sa kada pag atubang sa mga parainom nin arak, dai kaini nalilingawan an pag istorya sa pinaka magayon na kaugalian nin mga parainom sa Naga, saro digdi an tirindugan sa inuman ni Paquito. An boot sabihon kan inuman ni Paquito, iyo idtong sadit sanang tindahan ni Mr. Paquito Ang sa kalye Panganiban na paborito kan mga Naguenio ta kahawig ini kan inuman sa mga pelikulang kowboy sa Las Vegas asin Texas, na an mga bida iyo sinda Gregory Peck, Steeve Reeves, Michael Caine, Kirk Duglas, Jack Palanz, Anthony Quinn, Clint Eastwood, John Wayne, asin daku pang iba. Sa pag istorya ni Tyo Roming, saro sa nagtataong kusog asin inspirasyon sa mga kalalakihan sa Naga iyo an masiram na irinuman nin maliputon na Pale Pilsen asin mag ra’ngot nin pulutan na barbecue sa tindahan ni Paquito maski sain man ini maglipat na puwesto. Maski ngani bako nang serbisa an pig iinumon ni “Romeo Vasquez”, ta gulpi an bawal, imbes mainit na salabat o turmeric an yaon sa baso pero may masiram na hamlean arog baga kan maharang na kinunot, inasal na sirang Abo asin pasayan na pig labunan sa sarong bote nin Sprite. An Sabang, Kostal na baryo sa banwaan kan Calabanga na pinag kukuanan nin pasayan, abo, tabangungo, lapez, pakan, pating, pagi, pompano, balaw, kasag, asin kadakol pang iba. Harayo nang marhay kun ikukumpara sa mga maliwanag asin maliput na mga beer houses sa Naga ngonian ta an tindahan ni Paquito medyo marumarom sana alagad nakapila an mga bikolano may pugol nin serbisa asin nag iirestoryahan nin maogma asin mayo nin rambol asin iriwal. Minsan pig gigiromdom ni Tyo Roming an mga amigo niyang mga jeepney driver sa Calabanga na poon alas 4 nin amay sagkod Bangui an pagkayod kaya minapahingalo sa tirindugan na inuan ni Paquito. Dai na sinda nahihiling sa centro kan Naga, ta arog ni Tyo Roming, gurang na, yaon na sa pagpahingalo, dai na nakakalakaw, ang paboritong istambayan sa mag hapon, iyo an balkonahe kan saindang harong asin solamente ang pag istorya kan masiram na irinuman sa tindahan ni Paquito iyo an inaapod na saiyang bukang bibig. Sa pagka bisto ko ki Paquito Ang, saro siyang maboot na negosyante, na mahilig sa maki amigo sa samuyang mga taga radyo, saro sa amigo ni Paquito iyo si Celso Baguio, mala ta parati niyang suba sa mga taga media iyo na an kahulugan daa kan radyo na DZRP mayong iba kundi Radyo Paquito. Kan magluya na an inuman ni Paquito, saka naman nag usbong an Inuman asin Asalan sa Barlin. Naging Famoso na pasyaran kan mga nag ooficina na sa saindang pagluwas sa alas cinco derecho sa kalye Barlin sa may likuran kan GSIS building harani sa Police Station. An mga tindahan igua nin mga inuman, asin sa gilid kan tinamo nakaturukaw an mga paratienda nin freskong sira arog kan, darakulang tanguigui, malasugue, pakan, lapez, tabangungo, bancules, pompano, mga an-it, kasag, darakulang posit, darakulang pasayan asin dakul pang iba. Sa luwas kan inuman iguang mga asalan nin sira, ta an mga para inumon na gusto nin masiram na pulutan, iyu an mina bakal nin sira asin ipapa asal sa may tindahan nin arak, iyo idto an rason na kadaklan sa mga naka long sleeves na empleado, minapuli na ikis an pag lakaw sa kaburatan asin kasiraman nin pulutan na inasal na sira. Iyo iyan an ladawan kan Naga antes na naglaog an henerasyon kan Cellphone, asin iyo iyan an panahon na puros sana kaogmahan ta mayong adik kundi an mag irinuman, mag harambugan tanganing magpahingalo gikan sa maghapon na trabaho sa oficina. Sindang mga parainum kaidto ki Paquito asin sa kalye Barlin, iyo na siguro an mga Lolo ngonian kan mga melennials na nasisiraman asin Ganado sa jamming nin irinuman sa Magsaysay asin sa M-Plaza ni Tato Mendoza.