An Kapitan Sa Maangas

Kahawig nin sarong cancion sa Bikol na an gamgam harayo an pinag lupadan, kadakol an pinag hapitan, kadakol an nakaibahan, alagad ini minabalik sa lugar na pinag mundagan. Mga taon 1960-1963, Si Jose P. Dialogo, Jr., pinaka joven, aktibo, pano nin pangitorogan para sa Partido, siya na elejer numero unong konsehal sa irarom kan Nacionalista Party sa banwaan kan Lagonoy, Camarines Sur. Kan panahon na idto, si Joe Dialogo, mayong pinag iba sa dunong kan mga lehislador kan Pilipinas arog ninda Salonga asin Manglapus ta siya iguang magayon, makolor na mga tataramon sa tribuna kun kaya siya an para kampanya para ki Congressman Felix Fuentebella an kalaban sa Partido Liberal iyo si Sebastian Moll, Jr. An pirmeng ka debate sa tribuna ni Joe Dialogo iyo an saro man na ma-talentong orador na si Bubby Dacer. Kan ako saro pa sanang pusikit na para dangog sa radyo, nadadangog ko na an pangaran ni Joe Dialogo, como sarong matibay na komentarista na an mga kahampang arog ninda Palmiano, Pidong Tria, Edcel Salvo, Eddie Alanis, Eddie Imperial, asin kadakol pang iba. Sa pag agi nin mga taon, mas nababantog an pangaran ni Joe Dialogo sa mga isyu manonongod sa reklamo nin mga trabahador sagkod na naitatak sa saiyang pangaran an pagiging sikat na Labor Leader. Siya solamente an sarong labor leader na nag aatubang sa mga kaso kan mga trabahador kontra sa mga kompanya. Siya an nag titindog sa mga kaso maski ngani bako man siyang abogado, asin iyo an bantogan na nagpapa gana sa mga kaso kan mga inaping pobreng trabahador. Masuerte man ako na naimbitaran kaibahan sinda Darius Bequillo asin Gabby Casemiro na mag testigo sa pag plantiar niya nin COC Punong Barangay para sa magayon na barangay kan Maangas duman sa Presentacion, Camarines Sur. Si Dialogo an pinaka maidad na nagdalagan bilang Kapitan sa edad na 87. Sigun saiya, panahon na para magbalik siya sa lugar na saiyang pig dakulaan, ini an Maangas na kaidto sakop kan Parubcan na ngonian inaapod nang Presentacion. Bakong suba-suba an performance ni Dialogo para sa mga taga Presentacion ta siya an nakipaglaba sa consejo kan Lagonoy para isuway an Parubacan na dating baryo kan Lagonoy kun kaya kan 1961 sa pasagi nin acta republika, an Parubcan naging Munisipyo asin pig pangaranan nin Presentacion bilang pag romdom sa heroism ni Teodorico Presentaion, Sr. na nagadan kan mga hapones kan WW2. Kaipuhan magblik sa Maangas si Joe Dialogo tanganing ibungkaras ini como pinaka importanteng lugar nin turismo, pag uuma asin pag sisira kan provincial. Maogma an samuyang biyahe ta naging mahalnas an saiyang pagplantiar sa oficina kan Comelec sa Presentacion. Sa pag bisita niamo sa Maangas, duman ko naaraman na 3 an saindang mayor na simbahan, Katoliko na menoria, Aglipay iyo an mayoria asin an Protestante. An kataid na barangay kan Maangas iyo an Adiangao, pero ini sakop kan banwaan nin San Jose. Sa pag agi mi sa Brgy Santamaria kan Lagonoy, naogma kami sa kadakol na paniendang gulayon lalo na an tunay na gulay na paku’ na masiram ihalo sa tabagwang. Samuyang pig pasyaran an para gibo kan masiram na Puto Tabla na produktong Lagonoyon arog kan masiram na binanban asin an samhod. An Puto tabla na gibo sa bagas, Natatandaan ko kan ako aki pa, ini an pasalubong kan samuyang ama na nababakal sa centro kan Naga alagad imported hale sa Lagonoy. Para ki Joe Dialogo, an COC para sa pagka Kapitan kan Maangas, arog kan importante nin sarong titulo nin lote, ta maogmahon sa saiyang pagmate na siya mina buelta sa lugar na pinag dakulaan na iyo an Maangas, an magayon na lugar sa Partido.