An Komiks sa Sablayan

Sa laog kan mga tindahan kaidto, nauso an magkaag nin sablayan arog kan mga linabahan na gubing na ibinabalad sa saldang tanganing maalang. An sablayan sa tindahan bakong baladan nin bado kundi bitayan nin mga komiks tanganing pag pilian kan mga gustong mag arkila asin magbasa. An inabot kong arkila sa komiks kaidtong mga taon 60s cinco sentimos para sa bagong isyu asin nagiging barato an bayad kung ini luma na, kurusot na asin parakit na. An komiks kapareho kan radyo na importanteng marhay sa laog kan harong ta iyo ini an saindang kaogmahan asin palipasan nin oras.

Kung sa radyo igua nin mga drama, igua man sa komiks, pareho sinda iguang “itutuloy” asin “wakas”. An mga UNCEAN kaidtong 60 asin 70 orogmahon kun “recess” ta nakapirila asin naka turukaw sa atubangan kan Maltos Store na iyo ngonian an kinamumugtakan kan Rodson Hotel. An Maltos Store iyo an pinaka dakulang arkilahan nin komiks sa Naga ta bako lang mga tagalog komiks an yaon sainda kundi pati mga komiks kan Amerika igua sa Maltos. An mga komiks hale sa amerika iyo an idtong mga istorya ni Supermam, Ice Man, Batman asin iba pa, mantang an mga komiks na tagalog, sikat man sa mga super hero arog kan Captain Barbell, Darna, asin Lastikman.

An mga aki na iguang kalintora, madaling maumayan kun tinatawan nin bagong isyu kan paborito nindang komiks kasabay an pag higop nin maimbong na Tru Orange. An mga bistadong komiks kaidto iyo an Pilipino Komiks, Pinoy Klasiks, Hiwaga, Lagim, Wakasan, Liwayway asin Bulaklak. Haros gabos na nagsikat na pilikulang Pilipino hale sa istorya sa komiks asin iyan pinapanginotan ni Fernando Poe Jr., Joseph Estrada, Jun Aristorenas, Jess Lapid, Ramon Revilla, Dolphy asin Chiquito. Pero igua nin sarong klase nin komiks na tunay na maogmang pagbasahon ta ini may kahalo nin mga bareta tungkol sa agrikultura asin iguang istorya nin mga tawo sa baryo na an bida iyo si Procopio. An komiks iguang titulong ANG TAO asin ini an pig iisyu kan Rice and Corn Administration (RCA). An parating istorya duman iyo an buhay kan mga taga bukid kan pagkatapos kan giera mundial numero dos. Nagigiromdoman ko an karakter ni Procopio, na sarong guapo, maskulado na taga baryo na an kalaban iyo an mga tulisan asin mga parahabon nin damulag sa baryo. Sa istorya kan Ang Tao, pinapahiling duman an buhay ni Sgt. Nakangisi, sarong Japanese struggler na nakiki guno sana nin mga tinanom tanganing dai siya magutom. Sabi ni Homer Abugao, klasmeyt ko kan Grade 5 asin ngonian nag iistar sa Toronto Canada, na ogmahon siya kaidto kung pig papasuble ko kan komiks na Ang Tao ta tunay na pang baryo an mga istorya.

Orgulyo ko man na iistorya sa mga amigo na kan taon 1974, napublikar sa Pinoy Klasiks an sakuyang “short story” na may titulong “ Estela”. Maogmahon an sakuyang familya kan maresibe ko an premyong cinco pesos na yaon sa Money Order kan Post Office na an nag firma sa tseke iyo si Mrs. Paguio an Publisher kan Pinoy Klasiks. Kadakol an nagsasabi na tunay na maogma an magbasa nin komiks asin ninhuli sa komiks gulping mga aki an tataong mag basa. Kung an plaka nin mga musika nagbabalik sa mercado ta mas magayon daa magpatugtog na nag uusar nin turn table, an dakulang kahapotan, magbalik pa daw an Komiks? Kun maibabalik an komiks, siguradong makakanood tolos magbasa an mga aki sa elementarya asin magkaka igua nin trabaho an mga matitibay mag drawing asin mga para gibo nin istorya. Sa komiks, kadakol an nagka inaguman ta duman ninda nahiling an Pen Pal Column na yaon an mga pangaran nin mga naghahanap nin “friends” hale sa gabos na banwaan kan Pilipinas. An mga melinyal o mga Jovenes ngonian siguradong mababaduyan sa komiks ta mas bagay sainda an internet, alagad sinda Lolo asin Lola na pirmeng naka tukaw sa balkon asin nag ririmong rimong sa kapungawan, siguradong maoogma kun liwat maibabalik ang Komiks.