An Loglog Ni Howard

Makuapo nin maisog na soldados Amerikano na nakipag laban pa sa mga kastila sa kadagaan kan nacion nin Cuba, iyo iyan si Howard Tate. Si Howard na bistadong amerikanong naguenio, alagad tubong Iriga City asin hale sa angkan nin mga Federis sa parte kan saiyang Ina mantang an saiyang Ama, na iyo an saro sa mga aki ni US Army Capt. Reuben Tate na nahiling nakipag laban durante kan US-Spanish war duman sa daga ni Fidel Castro. Si Howard Tate nakapangagom nin maboot asin magayon na daraga hale sa familyang Hidalgo na taga diyan sa Balintawak. Sa pakikipag kapehan ni Howard sa mga amigong taga media, saiyang dai nalilingawan ang “loglog”, sinabawan na pancit na iguang manamit na sarsa asin ang sabaw hale sa ginagang tulang nin orig. An Loglog iyo an pinag gikanan kan famosong “Kinalas” na ang timplada iyo an ordinaryong loglog na pig Haluan nin kinalas na mga laman-laman sa payo kan orig. Si Howad Tate an ejemplo nin Soltero na nag adventure sa ibang lugar, haloy siyang nagtrabaho sa mayayaman na ciudad duman sa Mindanao, dara kan pagiging mestizo, nagi siyang basketbolista sa Manila asin sa Mindanao, sagkod na nagtrabaho siya nin haloy sa man iba ibang estado duman sa Amerika. Naabot na ni Howard Tate an Middle East, asin nakaduman na siya sa Iran asin India. Sa pagigi niyang adventurer, nakanood si Howard nin man iba ibang lenguahe asin na experiencia niya an man iba ibang kultura. Sa gabos na bagay na saiyang nahiling asin na experiencia sa ibang nasyon lalo na duman sa Amerika, mayo siyang ibang pig hahanap kundi ang “Loglog” na iyo an saiyang nakahiligan na kakanon digdi sa Naga. An loglog kapareho man kan bantog na Bicol Express, ta ini masiram asin makusog sa buhay. Sa mga istorya kan mga Naguenio ang loglog nadiskubre sa Naga mga decada 60. Kan itindog ang Supermarket kan 1967, pinaka tampok na pagkakan sa raya nin mga karehan na yaon sa 2nd floor kan Supermarket siempre iyo an loglog. An loglog sa supermarket, pirmeng iguang kapartner na puto lanzon o puto tabuco. Masiramon magkakan nin loglog sa karehan kan supermarket ta igua nin mga magagayon asin mga seksi na servidora an pig tutugutan kan Manager na makipag istoryahan sa mga customer na lalaki. Lalong minasiram an loglog kun nagtutogtog ang Jukebox na pig huhulugan nin .25 tanganing mag itok an plaka. Dai pa uso kaidto an loglog sa Dayangdang ta ang loglog nakukua maski sain man na barangay na iguang nag aaging karetela o trimobile. Ang mga parasine kaidto sa Albe Theatre orogmahon ta sa saindang pagluwas mapasiring tolos sa loglogan na yaon sa atubangan kan Albe. Sa mga Mall, dai nakukua ang loglog kaya ngonan, kaipuhan mo pang magpasiring sa Dayangdang o sa crossing kan Carolina tanganing mag loglog.