An Magic Banwit Ni Polding

Kadikit pa sana an mga harong na gibo sa tiklad asin kawayan duman sa Cagliliog sa banwaan nin Tinambac, Kaya ang baryo, matuninong asin maogma ang pagbuhay. Pobre sindang paghilingon ta ang mga harong mayo nin koryente solamente gasera an ilawan sa pagka bangui, daga an salug sa kusina asin an lutuan iyo an talohong asin bukas an pintuan sa may bangerahan. Mayo pa nin poste nin elektrisidad kaya ang nagtataong Liwanag sa dalan iyo ang milyones na anininpot sa mga kahoy.

Antes kan pagturog, naging ugali kan mga familya asinn pagtaraid an mag irestoryahan sa balkon mantang nag hihigop nin mainit na salabat asin naghihinanyog nin programa sa radyo. An parating tema sa istorya iyo an natatapos pa sanang giyera mundial numero dos asin an tawong lipod. An mga istorya kan mga gurang iyo ang pag tarago kan mga hapones sa mga kabukiran asin ang pag lupad kan mga eroplano kan mga amerikano sagkod na an tema napasiring sa mga amerikano na nagpurutol nin mga troso sa kataraid na baryo. Pinag oorolayan man an maliwanagon na garong ciudad na isla kan Lamit harani sa saindang banwaan na pinag gigobohan nin mga lawanit asin plywood.

An pagsubang kan aldao sa pagka aga, saro sa pinaka magayon na oras sa Cagliliog ta an mga tawo, nahihiling sa saindang mga natad na naglilinig, nag sisighid asin nagluluto nin pamahawan na sinanlag na an panira iyo an ginisang balaw asin binating sogok nin gona hale sa saindang libod. Sarong pobreng familya kan mag agom na Leopoldo asin Cornelia Villamor an namidbiran sa lugar na iguang pig aataman na “Magic Banwit”.

An magic banwit pag rugaring ni Tyong Polding. Ini bantog sa kostal na masulongon sa pagsubad nin mga sira, darakula man o saradit. Sarong aldao, kinurahawan ni Tyang kune si Tyong Polding, “ Hoy Polding, odto na sana mayo pa kitang panira, sige sana ang duyan-duyan mo”…Tolos balikwas si Tyong Polding asin kinua ang magic banwit na nakasuksok sa lanob na samil. Naglunad sa baroto na de sagwan pasiring sa dagat. Pagkalihis nin sarong oras, nagdadangadang na an baroto ni Tyong Polding asin sa pag doong kaini sa baybayon, bitbit na sa saiyang abaga ang darakulang pugapo, pompano, asin tabangongo.

Kune! Kurahaw ni Tyong Polding…gatungan mo na ang uring na bakawan ta asalon ta ang pompano sagkod an pugapo, asin paksiwon ta an tabangongo na iguang dahon nin lubas ta madigdi si Padeng Alot kaiba si Mading Ebing ta harayo pa an biyahe ta hale pa sinda sa La Medalla. Aro aldao, haros arog kaiyan ang ginigibo sa pangodtohan kan mag agom na Polding asin Kune, na sa pagka onog kan sinapna na bursage, saka pa sana madisponer nin panira gamit an “Magic Banwit”.

Sa pag agi kan panahon, an saindnag mga aki asin makuapo, padagos na nag heheras kan istorya kan magic banwit ni Lolo Polding. Dara kan igua na sindang pinag adalan sa UNC, sinasabi ninda na mayong magic an banwit ni Lolo Polding, imbes, birhen na birhen pa kaidto an kadagatan kan San Miguel Bay kun kaya pano-pano nin sira asin madali ang magbanwit asin mamalakaya. Maski sa hababaw na parte kan kadagatan kan San Miguel Bay, madaling magbanwit nin pugapo, madaling mag pangke nin Pakan asin Lapez, madaling magbanwit nin darakulang abo. Ngonian na panahon mayo nang magic an mga banwit, dara kan pagdakul nin mga trawl asin pagdakul nin mga bokatot, nagkulang na ang sira sa may Cagliliog. Nuarin pa daw kaya liwat na ma experencia kan mga tawo duman ang magbanwit nin darakulang sira na haros nag aaragawan sa banwit ni Polding. Tama an sabi kan mga tawo ngonian, an mga tawo kan inot na panahon mayong kwarta asin mayong magayon na bado, alagad Sagana sa masisiram asin masustansya na pagkakan.