An Makolor Na Buhay Ni Corring

Si Socorro Federis Tate, mas bisto sa apod na “Corring” na namundag sa Iriga City kan Octobre 13, 1916. An saiyang ama nagadan kan siya aki pa asin kulang pa nin pagka aram kan saindang familya, kun kaya solo an saindang ina na iyo an nagpadakula sainda, pero an saiyang ina nagadan kan taon 1969. Si Socorro Federis nag adal sa St. Agnes Academy duman sa Legazpi City, asin nakikidagos siya sa sayang Lolo Andong Belza na tubong Nabu asin kaibahan si Lola Atay.

Durante kan makusog pa si Socorro Federis mahilig siyang mag atender sa mga alumni homecoming kan saiyang mga inagihan na escuelahan, asin an saro sa maogmang experiencia ni Socorro iyo ang mag atender nin homecoming duman sa Los Banos na dai niya nanggad malingawan an kagayonan kan lugar. 1963, kan siya ikasal ki Thomas O. Tate, asin sinda pinag biyayaan nin anom na aki, apat na lalaki, asin duwang babae. Kan mag abot an WW2, naghale sinda sa Centro kan Iriga asin duman sinda nag istar sa Mount Iriga tanganing maitago an saiyang esposo na si Thomas na sarong American Mestizo asin iyo an pinag hahanap kaidto kan mga soldados hapones. Tanganing mabuhay sa panahon nin giyera, namuhay sindang para oma asin nag asikaso kan badang na pag rugaring ni uncle Lazaro Mastrado Mamoco, asin iyo idto an panahon na saindang na sumpungan asin naging amigo si Dionisio Korong alias “gulay” na bantog na matibay sa pana asin garud. Si Korong nabisto sa kabukiran kan Iriga na maisog na gerilya kaya binisto siyang War Hero.

Kan mag abot na an Peace Time, asin sa katangaan kan dekada 50, Si Socorro Federis Tate nagtukdo nin English sa Anglo Chinese School sa Iriga City. Sa saiyang bakanting oras, si Socorro mahilig mag surat nin “English Short Stories”. Nakapag gibo siya nin 47 na istorya, 46 kaini an napublikar asin saro sana an “unpublished”. Duman nabisto sa Kabikolan asin Kamanilaan an pangaran na Socorro Federis Tate na para surat nin short stories na binabarasa sa mga pahina kan Philippine Free Press asin Focus Magazine ni Kerima Palotan. An saro sa saiyang mga libro iyo an “SOCORRO FEDERIS-TATE’S MIDNIGHT and other stories”, gulpi siyang naresibeng awards kabale na an prestihiyosong Bikolista Prize na pig award kan Ateneo de Naga University kan 1989.

Durante kan katahawaan kan taon 60, nagtukdo siya sa tolong escuelahan sa Iriga City, yaon sa Anglo sa pagka aga, La Consolacion sa pagka hapon, asin sa pagka bangui yaon siya sa Usant. Pagkatapos kan ultimo niyang subject sa Usant, kaipuhan niyang mag relax asin mag unwind sa paagi nin pagkawat nin Mahjong kaiba an saiyang mga amiga.

Sa pagretiro niya sa pagtukdo sa mga escuelahan duman sa Iriga City, siya an pig pangaran na Dean of Women sa Ateneo de Naga asin paminsan minsan nagtutukdo siya nin English asin Literature sa Ateneo. Dai nanggad nalilingawan ni Mrs. Tate an saiyang mga paboritong estudyante na iyo sinda Junie Grace Cruz, Junet Ayo, na sarong retiradong Huwes asin nag iirok ngonian sa America,; Tangtang Verdadero, asin si Butch General. Maski ngani gurang na asin retirado na si Mrs. Tate, dai nanggad niya nalilingawan an mga paboritong estudyante ninhuli ta sinda mga bright students sa Ateneo. Kan tapos na an saiyang termino sa Ateneo, si Mrs. Tate nagtukdo man nin English sa Holy Rosary Minor Seminary. Si Mommy Tate masuerteng pinadangat kan mga Seminarista mala ta maski siya yaon na sa pagpahingalo asin retirado na, mayoria kan saiyang mga bisita sa saiyang kumpleanio iyo an mga kapadean asin seminarista ta siya pa nanggad an pig dudulok sa pag pakarhay kan saindang Thesis na mayong pig hahagad na bayad. Sa mga amiga, bisto siya sa pangaran na Corring, Mrs. Tate sa mga estudyantes, asin Mommy Tate sa mga seminarista. Nagadan si Corring kan 2004 sa edad na 87. Note: Thanks to the story of her son Howard Tate.