An Maogmang Lugar – City Of Pilgrims

KAN SI PAGKA GADAN ni Santo Papa Juan Paulo (Pope John Paul II) dakul na mga relihion na may mga iba-ibang pagtubod an presenteng nakidamay sa lubong niya sa Roma. Igwang mga Budista, Hudeo, Islam, Hindu, Ortodox, Ebangelista, Pentecosta o mga iba-ibang denominasyon na Protestante, asin iba pa. Matuninong si seremonyas asin magayunun.

Presente man si mga presedente asin mga lider kan kadakul na nasyon arog baga kan si mga hale sa Saudi Arabia, Israel, America, asin Iran, na magka iriwal pero magkasararo sa pag damay sa lubong kan sarong representante ni Kristo.

Man laen-laen na doctrina pero hararani an pag tubod. Garo baga ini sarong gibo-gibo kan langit na magka igwa nin pagkaka sararo sa kinaban sa irarom kan satuyang Kagurangnan.

Dakul nagsasabi na si Pope John Paul an nagbukas kan pintuan sa mga protestante asin sa mga ibang kristianong denominasyon na maski na ngani dakul kitang diferensia sa satuyang mga doctrina, dakul man kitang mga nagkakaparehong pagtubod. An bansag ngani kay Pope John Paul kaidto saro siyang maki ekumenismong papa.

Saro pa - siya lang an Santo Papa na naka bisita satuya sa Pilipinas nin tolong beses. Saro kan dae pa siya Santo Papa kan 1978. Asin kan Santo Papa na sya kan 1981 sagkod kan 2005.

HARANI NA NAMAN an fiesta ni Ina. Kadakul kitang mga bisitang maarabot sa satuyang An Maogmang Lugar. Mga turista, mga negosyante, mga dayuhan harale sa ibang nasyon, mga deboto, mga ma osyoso lang o mga adventurero, mga gusto magka igwang ilusion na taga Bicol, mga miembro kan man laen-laen na relihion, asin iba pa...

Pero an habo ko lang mangyari si arog kan sarong insidente na nangyari mga pirang taon naka agi. Siguro ma uyun man po kamo sakuya.

Sarong grupo nin mga inaapod na “born again” na mga ebanghelista na may mga darang karatula nag protesta sa pag prosesion ni Ina. Inapod kitang mga deboto ni Ina na mga bastos asin minumuda pa kita ta mga para samba daa kita nin mga idolo. May lider sindang dayuhan na Amerikano na nagtataram sa mikropono nin mararaot na dae ko ngani ma imprenta digdi sa pagsusurat ko. Nag babanal banalan lang daa kita pero mga makasalan daa kita,

Nahiling ko po ini sa sarong video. Dae ko aram kun nangyari ini otro kan naka aging mga fiesta pero dakula po si kaangutan ko kan nahiling ko ini. Imbes na magpasalamat ining mga mayong ugali na mga tawong ini sa pag pa dagos sainda sa kapistahan kan satuyang Ina kan Bicol, iyo pa an mga ginibo. Garo baga pina dagos mo na sinda asin pina kakan sa harong mo pero minuda ka pa asin ininsulto.

Dakul po akong mga amigo asin amiga na may mga ibang relihion o pagtubod pero aram ko bakong arog kaini an ugali ninda. Naiimbitaran pa ngani ako sa mga kapistahan o mga festival kan mga relihion ninda pero mga karahayan an pag trato ninda sa mga bisitang may ibang relihion.

Igwa man sa pamilya mi na mga “born again” pero inu-umaw ko po an mga marhay na padalagan ninda sa buhay. Mga marayon po sindang tawo. An agom ko ngani protestante asin labi na kaming 41 taon na kasal pero mayo kaming problema sa pareho ming pag moot sa Kagurangnan.

Igwa ngani akong naka agi pa lang na tugang na pamayo kan sarong templo nin budismo asin nag lelectura sa mga Monasterio asin Lamaseryo (Dalai Lama) sa Pilipinas asin sa China pero deboto po siya ni Ina. Saro sa mga tugon niya bago siya magadan iyo an pag budbud kan dikit niyang abo sa may duungan nin pagoda ni Ina nganing maka attendir daa siya kan fluvial ni Ina kada fiesta. Nag pa lubong man po sya sa lumang sementerio kan Peñafrancia mga pirang lakad lang hale sa imagen ni Ina.

Natubod sya sa tukdo kan Budismo sa katuninungan, pagka moot sa kalikasan, asin sa pag hingua sa kaaraman o sa kadunungan. Sabi nya an gabos daang mga nagtutukdo nin karahayan marhay ngaya iyan na relihion.

Miembro man siya kan Theosophical Society na pinamamayuhan kan si taga Naga na si Vic Hao Chin asin adviser dati siya kan Ananda Marga kaidto. Dakul man siyang mga aram asin kairiba na mga Bombay sa relihion Hindu pero nag papa Bible study po siya sa harong niya kairiba gabos protestante o mga Christian an apod niya.

Siguro po sinigurado niya na aram niya an gabos na dalan pasiring duman sa Pinaka Maogmang Lugar.

Kaya dae ko maintindihan kun ano an pinag gikanan kan mga ini. Mag pasalamat po sinda ta matuninong asin mga pasensyoso an mga taga Naga. Saka dae an taga Naga na baba sa arog kaining klaseng mga tawong mayong kamugtakan an mga ugali. Pag mate ko abusado sinda sa mga maboboot na arog satuya pero tarakot sinda mag protesta sa ibang relihion.

Kun mangyari ini asin mayong gibohon an mga autoridades, pwede ta man siguro sinda kaulayon sa marhay na paagi na sala an pig gigibo ninda ta yaon sinda sa laog kan harong kan Nuestra Señora de Peñafrancia na Ina kan satuyang Kagurangnan.

An Ciudad nin Naga inapod na Ciudad nin mga Peregriho (City of Pilgrims) mayormente ta dakulaon an pag selebrar ta kan kapistahan kan satuyang Ina.

Magka sararo po kita. Dagos po kamo gabos sa An Maogmang Lugar na Naga maski anong pagtubod nindo ta namumutan kita gabos kan satuyang Ina.

VIVA LA VIRJEN! VIVA EL DIVINO ROSTRO!