An Pagtios ni Leila de Lima

Kun ako si Senadora Leila de Lima, mawawaran na akong pagtubod sa prinsipyo nin patas asin maka-hustisyang sistema kan korte sa Pilipinas. Bako lang suya, kundi grabe na siguro an sakuyang kaanggotan ta kan nakaaging Hunyo 7 kaining taon, dai inaprobahan kan Muntinlupa City Regional Trial Court Branch 256 na makapag-piyansa si de Lima na anom na taon ng nasa priso.

Dara kan sakuyang kaanggotan, siguro ipapangadyi ko na si mga trapong deputado na binastos an pagka-babae ni de Lima sa ginibong congressional hearing magtios man lugod sa impiyerno. Dapat magsakit an mga deputadong ini sa buhay na mayong kasagkoran ta idgi sa kinaban dai ninda namatean an konsekwensya kan saindang ginibo ki de Lima dara kan saindang posisyon sa gobyerno.

Bakong suba-suba an mapriso nin anom na taon base sa kasong gibo-gibo lang. Estado an nagdidisisyon kun ano an pwede asin dai pwedeng gibuhon kan sarong tawong napripriso. An dai lang kayang kontrolon kan estado an kaisipan kan sarong priso. Iyan an nagin buhay ni de Lima kan nakaaging anom na taon. Grabe an saiyang nagin kaulangan; grabe an saiyang pagtios sagkud ngunian.

An totoo mayo man makusog na ebidensya laban ki de Lima. Si mga nagtestigo kontra sa iya nag-aratrasan na. Kaya ngani pinawaran na sya nin sala sa duwa nyang kaso manunungod sa droga.

An hinahagad man lang kan kampo ni de Lima sa korte tawan sya nin temporary freedom mientras na dai pa nareresolbaran an pantulo nyang kaso. Bako man syang inaapud na “flight risk.” Mayo man syang planong magdulag o magtago arog kan dating senador na si Panfilo Lacson. Ano ta dai sya tinugutan makapag-piyansiya? Hain an hustisya?

Senior citizen na si de Lima asin may mga namamatean na arog kan dating senador na si Juan Ponce Enrile na akusadong plunder pero tinugutan kan korte na makaluwas sa priso. Ano ta dai tinugutan kan korte na makapag-piyansa man lang si de Lima? Hain an hustisya?

Ano ta si Imelda Marcos na convicted na kan Sandiganbayan dai napripriso? Pero si de Lima, na dai pa nacoconvict, anom na taon ng nasa kalabos? Hain an hustisya?

Ano ta sa laog nin perang bulan lang, dai ngani inabot nin sarong taon, naresolbaran tulos si kasong “illegal drug possession” ni Juanito Remulla III na aki ni Secretary Crispin “Boying” Remulla kan Department of Justice (DoJ)? Pero ano ta sa laog nin anom na taon dai pa nareresolbaran an kaso ni de Lima? Hain an hustisya?

Sasabihon kan mga tawo, “Onli in da Pilipins.” Iyo man nanggad, magtubod man kita o dai, duwang klase an hustisya sa Pilipinas: Hustisya para sa mga makusog an kapit sa mga nasa poder sa gobyerno asin hustisya para sa mga kulang o mayong koneksyon arog kan mga aktibista, mga durogista, mga kapobrehan o arog ni de Lima, na maski na ngani dating senadora, mayong naginibo kan pinag-initan asin ipinapriso kan dating presidente. Pano pa kaya an mga ordinaryong Pilipino?

Sa sakuyang paghiling, nagkakasararo an mga nasa gobyerno arog ki dating Presidente Rodrigo Duterte, Presidente Bongbong Marcos, Secretary Crispin Remulla, an kadaklan sa mga trapong deputado asin mga senador , asin an mga huwes na may utang na buot ki Duterte na gibuhon ehemplo si de Lima kun ano an mangyayari sa sarong tawo na kritiko kan gobyerno.

Kun si Bongbong Marcos o si Boying Remulla para sa hustiya, gigibuhon ninda an gabos na medyos matawan piyansa si de Lima o maresolbaran na an kaso nya. Aram ta man na pag may gusto an gobyerno, lalo na an presidente, pirming nasusunod an kagustohan kan presidente. Halimbawa, an Maharlika Investment Fund (MIF) nagibohan baga nin paagi na makalusot sa kongreso saka sa senado maski kontra an kadaklan na mga Pilipino.

An problema sa mga politiko, mas iportante sainda an politika imbes na an hustisya. Aram ni Bongbong Marcos na mayong kasalan si de Lima. Kayang-kaya nyang mandahan si Remulla na probisional na iparelease si de Lima. Kaso nag-aalangan si Marcos ta aram nya kun ano ang pwedeng gibuhon ni Duterte asin kan saiyang mga taga-suporta laban sa iya. Biktima si de Lima kan arog kaining kaisipan kan mga politiko. Siyempre nasa isip ni Marcos bako lang an saiyang political survival, kundi pati kan pamilya nya sa maabot na mga aldaw.

Kun minsan naiisip ko lugod kun an huwes na may kapot kan pantulong kaso ni de Lima, may kadikit na takot o habong kontrahon an kagustohan kan presidente na nag-appoint sa iya na maging huwes, na iyo si Digong Duterte. May mga impormasyon nganing nagluwas na may tugang na abogado palan an huwes sa kaso ni de Lima na nagin abogado man ni Ronnie Dayan kan ini nag-execute nin affidavit kontra ki de Lima kan 2016. Pig-recant na ni Dayan an affidavit nya na inbwelto si de Lima sa ilegal na pagbenta nin droga ta puenersa asin tinakot lang daa sya.

Kaya dai maibitaran na isipon kan mga tawo na sa Pilipinas aram kan kadaklan na maski an mga huwes nahahaluan nin politika an saindang desisyon.

Biktima man si Senadora Leila de Lima kan arog kaining realidad sa gobyerno pati sa hudikatura, dai sya nawawaran nin paglaom. Arog kan sinabi nya, “I shall never waver in my quest for justice and vindication. I refuse to be broken. Surrender is not an option.”