Andaya iyo na an malaban sa cargong gobernador vs Louigi
Si dating Majority Leader Rolando Andaya Jr. kan Camara-baja iyo na an isasabat na candidatong gobernador kan Camarines Sur ki Louigi Villafuerte sa maabot na eleksyon sa Mayo 2022 kun dagos na an candidatura ni Bise Presidente Leni Robredo sa maabot na laban sa presidential election.
Arin man sa duwa sinda Andaya asin Robredo iyo sana an puedeng makadaog sa eleksyon contra sa Villafuerte.
Si Dating Congressman Nonoy Andaya na macandidatong gobernador asin si Alcalde Labas Reyes kan Milaor, CamSur na kaalyado kan mga Villafuerte nagpakua nin retrato sa sarong okasyon sa Avenue Hotel, Ciudad nin Naga. (Areglado news)
Ini an mga pahayag sa Bicol Mail ni Alcalde Tomas Bongalonta kan Pili, Camarines Sur asin siya iyo an saro sa nagtulod ki Andaya sa ginibong okasyon sa kumpleanyo kan March 11 sa ginibong tiripon ninda sa Ragay, CSur kun tano sinda Andaya asin Robredo iyo an puedeng pagpilian nganing magrampahog sa politica an Villafuerte.
An pahayag na ini kan jefe ejecutivo mantang nagrarani na an filing kan certificate of candidacy sa Comelec sa Oktubre 1-8, 2021 asin naheheling ninda an dalagan ni Robredo pasakat na sa pagcandidatong presidente sa 2022.
Sa kumpleanyo kan dating diputado kan premir distrito an mga nagsusuportang alcalde asin lideres kan grupo nagkasararo na dapat maglaban giraray si Andaya kun dagos si VP Leni sa eleksyon nasyonal.
Sa sinambit na okasyon inako ni Andaya an endorsement kan saiyang mga lideres, alcalde, bise alcalde, consejales, asin apat na miembros kan junta provincial.
Digdi na siya nagdeclara bilang ‘‘interim candidate’’ sa kargong gobernador kan Camarines Sur alagad sa ngunian dai paman na-anuncio kan saiyang magiging candidatong bise gobernadora, sabi pa ni Bongalonta.
Kan nakaaging laban ni Andaya contra ki incumbent governador Migz Villafuerte sa apat na congressional district kan Camarines Sur solamente sa Rinconada area sana siya dinaog nin dakulang voto asin sa total na nakuang voto ni Migz nakalamang siya nin maabot sana sa cinco mil na voto.
An saiyang magiging kalaban, Louigi Villafuerte na tugang ni outgoing governor Migz padagos na an paglibot sa mga banwaan kan Camarines Sur. (dpa)