Angat Buhay Village sa Lupi legacia ni VP Leni

Lupi, Camarines Sur --- Premirong nangyari sa banwaan na ini asin orgulyo kan namamanuan asin opisyales lokal na an saindang sadit na municipalidad iyo an napili kan Leni-Kiko team na magsikad digdi an pinaka-premirong aldaw kan campaign period sa candidato nasyonal.


Enot sa mga presidentiable si VP Leni Robredo asin vice presidentiable Senador Kiko Pangilinan sa perang decada an mga nakaaging presidential elections na an duwang halangkaw na opisyal na naghahagad nin mandato kan tawo sa eleksyon nganing pilion an saindang banwaan.


Sinda mainit na sinabat ni candidatong Gobernador Nonoy Andaya, Alcalde Lelian Matamorosa asin mga opisyales lokal mga alas 7:30 nin aga, Febrero 8, 2022.


Si Consejal asin candidatong bise alcalde Noel Agravante nagpahayag na sarong historico sa saindang municipio na pinaka-premirong candidatong presidente asin bise presidente kaibanan an saindang mga candidatong senador na sinda, Antonio Trillanes, Risa Honteviros, Richard Gordon, Teddy Baguilat, Chel Diokno, Sonny Matula, asin representante ni Senador Leila de Lima na inapod an grupo bilang Tropang Angat an nakatungtong sainda campaign period.


Si Agravante, 20 anyos na komo consejal kan saindang banwaan alagad sa mga nakaaging presidential election an parating political rally ginigibo sa Ciudad nin Naga asin sa mga piling darakulang banwaan.

Caravan kan Team Leni-Kiko sa Camarines Sur mainit na sinabat kan mga Bicolano sa inagihan na mga banwaan sa limang congressional district kan provincia. (VP Leni FB)


Sa mensaje ni VP Robredo na legacia an banwaan na ini kan magbisita siya pakatapos kan duwang bagyong Rolly asin Ulysses kan Deciembre 2020 nganing magdara nin relief goods naheling niya an mga nagabang mga harong asin an iba yaon pa sa evacuation center.


Alagad nagtadum sa saiya na dapat matabangan an biktima kan calamidad kaya saiyang naisipan na magpa-tukdok nin 120 unit kan housing project sa Poblacion na ngunian inaapod na Angat Buhay Village.


Ini an legacia ni Robredo sa saindang banwaan kaya digdi nagsikad an saiyang campaign period, sabi pa kan consejal.


Sinabi pa kan VP na nagpuon an proyekto sa saiyang dikit na fondo sagcod na nagtarabang an iba pang organisasyon maging individuals asin an LGU Lupi nag-opresir nin relocation site.


‘‘Kaya ko po ito ikinu-kuwento sa inyo dahil kung ang pamahalaan at ang gobyerno ay tapat, talagang aangat ang buhay ng lahat. Wala naman pong masyadong pera ‘yung aming opisina, alam niyo iyan. Pero noong typhoon Rolly saka Ulysses, marami pong mga private individuals ang tumulong sa atin. At ang tulong pong ito nanggagaling sa tiwala. Tiwala na kung ano ang ibibigay niya sa atin, siguradong makakarating ito sa mga pinakanangangailangan.’’ (DPAureus)