Angelita De Leon – Peña. Deboto ni Ina

NGUNIAN NA MARSO may sarong okasyon na inaapod na “International Women’s Month”. Ginibo ining opisyal kan United Nations kan Marso, 1975. Sa Pilipinas inaapod ta ining “National Women’s Month.” “Babae sa Lahat ng Sektor, Aangat ang Bukas” an tema kan Pilipinas sa okasyon na ini.

Sa bulan na ini tinatawan ta nin pag umaw asin rekognasyon an mga babae sa kinaban sa gabos na sektor kan kumunidad asin gobierno.

Dakul akong mga inu-umaw na babae sa linia kan mga trabaho ninda. May mga parasurat, opisyales kan gobierno, mga doktora, maestra, negosyante, mga nars, caregiver, mga waitress, mga full-time na ina, asin iba pa.

Pero sa ibabaw kan gabos na mga na sambit ko, may bisto akong sarong Bicolana na ekstra-ordinaryo an mga na-ginibo. Dae ko siya malilingawan. Sigurado ako dae man siya malilingawan kan mga Bicolano sa Amerika.

Sinasabi kong dae ko malilingawan ta nag paaram na siya kan Marso 8, 2025, aldaw asin bulan kan International Women’s Month.

Angelita “Lita” De Leon – Peña an pangaran niya. Saro siyang Bicolanang taga Naga. Namundag siya kan Abril 11, 1947.

Haloy na panahon nag istar sa Jersey City, New Jersey si Lita. Nag trabaho siya sa mga darakulang korporasyon pinansyal na arog kan Citibank, US Bank, State Street Bank, The Bank of New York Mellon, asin Philippine National Bank. Nagin respetado, asensado, asin propesyonal siya sa linya niya.

Maski na ngani magayon na an propesyon niya, serbisyo sa kumonidad asin sa tawo an tunay na dedikasyon niya sa buhay. Nagin saro siyang lider kan mga Bicolano asin mga Pilipino sa Amerika. Nagin presidente siya kan Bicolandia National Association kan enterong Amerika, presidente kan Handang Tumulong Foundation, Direktor kan Jersey City Training and Development Center, presidente kan Philippine Women’s University Alumni, presidente kan Philippine Independence Day Council asin iba pang mga organisasyon manungod sa satuyang kultura kabali na diyan idtong mga grupo na nagtatabang sa mga tios satuya.

Pero maski na kadakul siyang na risibi na mga premio, mga plake, mga honra sa trabaho, sa mga organisasyon, sa konsulado kan Pilipinas, saka iba pang grupo, padagos pa pirmi an sebisyo niya sa pag tabang sa mga nanganga-ipuhan.

Saro siyang maogmang humildeng tawo. Maka pamilya asin pirming marhay an trato sa gabos. Pag nagkaka-hilingan kami ni Ate Lita pirming na gayon an pag mati ko. Arog kayan an aura niya. Bihira na an mga arog kaining tawo. Inspirasyon asin modelo siya kan dakul na tawo. Kaidtong kaipuhan kong empleyadang katabang sa opisina, pina darhan niya ako tulos nin marhay na tawo sunod na aldaw. Dakula man na tabang an naginibo ni Ate Lita sa ama ko pag abot sa mga aktibidades kan mga Pilipinong beterano kaidto sa Jersey City. Haloy ko nang midbid si Ate Lita. Sa Naga pa kami magka bisto, kaya Ate Lita apod ko saiya.

Pero sa pag tubod ko an pinaka dakula asin pinaka magayon na na-ginibo ni Ate Lita sa kinaban na ini, iyo an saiyang dedikasyon asin debosyon ki Ina – La Nuestra Señora de Peñafrancia.

KAN AGOSTO 1990 pig pundar ni Ate Lita saka kan sarong taga Naga na si Lulu Menor an “Our Lady of Peñafrancia Devotees Association.” Tiniripon niya an mga Bicolano sa New Jersey, New York, Connecticut, asin sa ibang mga estadong kataraid.

Mag poon kaidto, nag paradakul si mga deboto ni Ina digdi sa parteng ini kan Amerika. Sa tabang kan saiyang agom na si Peng Peña asin kan mga Bicolano, nagka igwa kaming sadiring fluvial na sakay sa Hudson River kada fiesta ni Ina. Maogmang nag kakatiripon an kadakul na mga Bicolanong deboto ni Ina na dae basta nakaka puli sa Bicol. Iristoryahan, karakanan, karantahan.

Naging parte na kan buhay ni Ate Lita ining debosyon asin selebrasyon kay Ina.

Kan taon 1999, nagka igwa na nin permanenteng lugar si Ina sa simbahan kan Our Lady of Victories sa Jersey City digdi sa Amerika. Sarong replica ni Ina an pig donar ni Arsobispo Leonardo Legazpi asin ni Monsinyor Romulo Vergara kan Basilika Menore sa Naga.

MGA PIRANG bulan na lang Septyembre na naman. Padagos an selebrasyon asin tiripon pero iba na kun mayo si Ate Lita.

Nakaka pungaw ta absente na si Ate Lita satuya. Presente na siya sa Pinaka Maogmang Lugar kataid kan satuyang Ina.

Miss na miss si Ate Lita kan mga ka-bisto niya. Pero dae ako sigurado kun na mi-miss niya kita.

Sa pag isip ko lang sibot-sibot siya sa mayong sukol na kaugmahan sa presente kan Kagurangnan asin ni Ina. Nag kakarantahan sa mayong pundong kaugmahan.

Naka puli na siya.

Viva la Virgen! Viva el Divino Rostro!