Anibersaryo kan CPP sa Bicol dai nakapalag sa full alert kan PNP, AFP

Sa tahaw kan pagdeclara kan AFP asin PNP na full alert sinda sa pagsabat kan ika-57 anibersaryo kan Communist Party of the Philippines kan Deciembre 26, 2025, heneralmente matuninong si paz orden sa Bicol.

An CPP/NPA nagdeclara nin apat na aldaw na ‘‘ceasefire’’ poon Kan Deciembre 25 asin 26, 2025 asin sa Deciembre 31, 2025 hasta Enero 1, 2026 alagad sinikwal kan gobierno huli ta ginagamit sanang pag-reorganisar kan saindang grupo, pagkalap nin bagong miembros, makabuelo sa pagbakal nin suplay nin armas asin iba pa.

Ipinaheling man ninda digdi sa Bicol na dai maghasok nin kariribokan mantang nakaalerto an mga Municipal Police Stations asin an AFP.

Nagkaigua sinda nin simpleng actividades sa tahaw kan haloy nang plano kan gobierno na dapat mabungkag na an grupo na inaapod na ngunian kan militar na mga terorista.

An armadong grupo ninda na New People’s Army natugdas kan panahon ni dipuntong dictador Ferdinand Marcos Sr. na iyo an ginamit na dahilan nganing mag-imponer nin martial law kan taon 1972.

Sa ngunian an Fuersa Armada kan Filipinas nagpahayag na padagos na nagbababa an mga tawo sa saindang ideolohiya. Nagpoon na nagluya an saindang fuersa kan magbalik an gobierno democratico kan nasyon pakatapos kan EDSA People Power kan 1986 sa panahon na nag-asumir sa pwesto si Presidente Corazon Aquino.

Digdi sa Bicol an 9th ID Division kan AFP nagpahayag na padagos nagsusuko na sa gobierno an mga rebeldeng NPA. Kadakle sa sainda nagsabi na mayong mangyayari sa saindang futuro kun padagos na yaon sa rebeldeng grupo.

Alagad an CPP/NPA padagos na nagdadanay mala ngani nagkaigua pa kan saindang anibersaryo.

Mga miembros kan PNP Bicol naka-full alert sa aldaw kan ika-57 anibersaryo kan CPP. (Retrato -PNP kasurog Bicol)