Aninipot sa Campo Cuatro

Dai lamang na-unambitan sa arin man na libro sa Bikol an pambihirang kalinigan asin mahamot na doros sa Barrio kan Campo Cuatro sa banwaan kan Tinambac. Yaon sain na kaya an milyones na Aninipot na iyo an nag seserbing ilaw sa poon nin mga kahoy sa Campo Cuatro na ngonian iguang bagong pangaran na Barangay Magsaysay. An pagiging malinig nin doros sa sarong lugar iyo an rason kaya igua nin mga aninipot na naglalayaw layaw sa poon nin kahoy. An mga kagugurangan sa lugar iyo an nag iistorya manonongod sa maogmang ta’nawon kun Bangui ninhuli ta nagliliwanag an saindang dalan sa paagi kan marambong na aninipot sa mga poon nin kahoy. Kan joven pa si Lolo Merto, an malaboy na dalan sa Campo Cuatro naliliwanagan kan mga aninipot sa tuyong ini saiyang pig aagihan lunad na pamaba’ na pig bubutong nin damulag tanganing darahon sa población kan Tinambac an mga sinakong kamoteng laman asin kamoteng kahoy. An barrio kan Campo Cuatro saro na lugar kan Tinambac na bistado sa mga root crops apwera pa kan pagkaka igua kaini nin mga darakulang poon nin kahoy na iyo an pinag kuanan nin mga troso. Sa joven na nae dad na quince anyos, naging trabaho ni Lolo Merto an mag transportar sa mercado kan Tinambac nin mga produkto lunad sa saindang pamaba’. Amay sa pagka Bangui, nagpapaka basug si Merto nin pamanggihan na maloto asin kinudkod ta makusog sa lawas antes siyang magtulak ta kaidto mayo pa nin toltol na tinampo na puedeng agihan nin Alatco o vehikulo. An mga taga Campo Cuatro mina lunad nin lantsa sa San Miguel Bay pasiring sa Bagacay antes maglunad sa TM Liner kun mapasiring sa Ciudad nin Naga. Harayo nang marhay ngonian na mga panahon ta an highway sa lugar na minaknektar kan Tinambac asin Siruma tunay na konkreto, sementado kaya dai na kinakaipuhan maglunad nin lantsa sa San Miguel Bay. Dai namalisyahan kan mga tawo an pagka wara kan mga aninipot kung bako sa istorya ni Zoilo na gikan sa familya nin mga para kopras. An saiyang mga magurang sinda Mr. and Mrs. Jose asin Adelina Cruz nagka inaguman sa paagi nin istorya kan aninipot sa Campo Cuatro. Si Jose asin Deling, nagsumpaan kan saindang daing kagadanan na pagka minootan sa presencia kan mga nag hihinghing na mga aninipot sa mga kahoy sa dalan pasiring sa Libtong, sarong bukal nin malipot na tubig gikan sa bukid. Dai lamang na-unambitan sa mga pelikula ni Gloria Romero asin ni Luis Gonzales an tungkol sa kagayonan kan aninipot sa oras ni Bangui arog kan mga tanow kan lawiswis kawayan asin huni nin gamgam. Sayang, dai na nanggad nagbuelta sa Campo Cuatro an mga aninipot na minataong Liwanag sa kabanggihan.