Antigen test libre sa mga tios

Andam an City Health Office kan City Hall sa arin man na residentes kan Ciudad nin Naga na mapakua nin antigen test alagad libre sa mga indigent o tios na familia asin si mga aplikante sa trabajo.

Sa sesyon regular kan Sangguniang Panlungsod kan Martes, Abril 27 inaprubaran an ordinansa na padreno si Consejal Sonny Rañola na dapat magkua giraray nin recomendasyon sa doktor mantang si may mga may kakayahan na magbayad cantidad sanang P1,000 asin kabale na si bakong residentes kan ciudad.


An taripang P1,000 barato na kumpara sa pribadong laboraryo na nagcacantidad P2,000 asin P1,800 sa Bicol Medical Center, sabi pa ni Ranola.


Sinabi kan consejal na Chairman kan Committee on Health sa sangguniang, si Dr. Vito ‘‘Butch’’ Borja an City Health Office naghurot sa consejo na kaipuhan nin ordinansa nganing magsingil nin bayad asin ilibre sa mga indigent na residente kan ciudad kabale na si mga frontliner.


Inaprubaran sa saindang sesyon asin nakatalaan darahon sa opisina ni Alcalde Nelson Legacion nganing mapirmahan.


Nagdadakul na an nagpapa antigen test sa City Health Office sa tahaw kan padagos na paglangkaw kan caso kan coronavirus disease sa ciudad.


Sa report ni Liga nang mga Barangay President Antonio Beltran, trece sa veinte sieteng barangay kan Naga an igwa nang mga caso sa ‘‘deadly virus’’.


Anom nang mga barangay hall an naka-lockdown huli ta ginagamit bilang isolation center.


Pinagirumdum ni Rañola sa mga residente kan barangay na magsunod sa health protocols. (dpa)