Anyare?
Ano an nangyayare sa Pilipinas ta siring kaini an kamurugtakan, may mga elehidong opisyales kan gobyerno na basang na sanang binabaradil gadan o irido?
May mayor, may vice-mayor asin ngonyan may gobernador an binadil sa laog kan saiyang compound, may nakadamay pang sibilyan an binarawian nin buhay kan mga lalaking armado asin nakasulot unipormeng militar.
Gusto kong maghapot sa mga awtoridad kun an mga ini nangyare dahil sa pagkukulang nin intelligence work sa parte kan mga kapulisan asin kan mga nanunungdan na awtoridad.
Ngonyan pa lugod sa lindong kan presenteng administasyon sa pamamayo ni PBBM na aki kadtong depuntong Presidente Ferdinand E. Marcos, an bagong presidente maan na marhay asin paseguro pirmi mala ta apuera kan pag-imbitar sa dakul na foreign investors tangarig mapakarhay an ekonomiya kan nasyon asin magka-igwa nin permanenteng katrangkilohan kaya nagbisita sa America, nagbisita sa Tsina, nagbisita sa Japan asin nagbisita sa Switzerland.
An mga Pilipino naglalaom nin estableng gobyerno, marahay-rahay na pagbuhay, bararatong barakalon lalo na an kakanon ta garo baga an gabos na kaalyado asin poderosong nasyones may asegurasyon ki PBBM na siya tatabangan kaiba an 110 milyones na Pilipino.
Pero sa mga makangirhat na pangyayare ngonyan lalo na an pagbadil gadan ki Gob. Ruel Degamo kan Negros Oriental mangalas kita kun bako ining pairarom na sabotahe kan mga nanunungdan maguin kan mga amigo o mga enimigo sa politika sa luwas asin sa laog kan satong nasyon.
Sagkod ngonyan gulpi pa an mga AWOL sa servicio militar o pulis na armado nin mga magagabat na armas, lisensyado asin dai lisensyado.
Nata ta dai yan nababantayan o nakokontrol?
Pigsasabi na puede ser na mantang mga politiko an biktima, mga politiko man an nasa likod kan mga pang-gagadan.
Pero an mga awtoridad dai pa naseseguro na politika talaga an tunay na dahilan.
Dae man pigseseguro na mga makawala an mastermind o utak kan krimen.
Kun kasuarin pa lugod may mga pangako kan mga kaalyadong nasyones na susurugon kita na dae mawaran nin kadagatan pero sa laog kan satuyang kadagaan may nawawaran nin buhay na mga Pilipino na sa kamot kan kapwa Pilipino.
Nagtutubod pa an kadaklan na an problemang ini kayang resolberan kan nakatukaw na presidente kan Pilipinas.
Nagtutubod pa an dakul na Pilipino na an mga kriminal kabali na an mga drug lords asin mga parapabakal asin paragamit nin ilegal na droga magkakadarakop man guiraray asin makukulong sa laog kan kalabos.
Pati an mga pasaway na miyembros kan fraternity na bako lamang nagbabalga kan anti-hazing law kundi nakakagadan pa nin saindang mga tugang kan organisasyon an mahuhulog na sa kamot kan mga awtoridad.
Tarabangan ta an satong gobyerno na mabantayan asin madakop an mga kriminal asin may isip kriminal.