Apat na daragita linupigan, saro sa biktima ginadan pa
Sa tahaw kan paglangkaw kan caso kan Covid-19 sunod-sunod man an mga caso nin pang-aabuso sa mga menor de edad na daragita sa Camarines Sur.
Sa laog sana kan premirong semana kan Agosto apat na caso an nairehistro. An saro matapos lupigan ginadan pa, nilaog sa sako asin tinago sa kaduotan, an suspechado nagsuko sa awtoriad alagad binawian nin buhay kan agawon si badil kan jefe de pulicia.
An pinakahuring insidente nangyari sa barangay Flordeliz, Milaor, Camarines Sur sa pag-ultanan nin alas 4:00 hasta alas 6:00 nin aga kan Agosto 9. An biktima 14 asin 16 anyos parejong tindera kan Dadas Pilinut sa Milaor kan laugon sa estaran kan suspechado an duwang daragita.
Igwang nakaheling kan magluwas sa residencia an suspechado na naka-face mask asin jacket na tolos nagdulag sa saiyang darang motorsiklo.
Si Police Capt. Rosalinda Moises, jefe de pulicia kan MPS Milaor nagpahayag na nagpapadagos na an saindang inbestigasyon asin hagad niya an kooperasyon kan mga biktima asin posibleng testigos sa nakaheling na nagluluwas na lalaki sa pig-eestaran kan daragita.
Sa Nabua, Camarines Sur makangerat an krimen huli ta matapos abusohon an biktimang doce anyos ginadan pa sagcod na nakua an bangkay sa laog kan sako.
Si Brgy. Kgd. Nestor Lavilla kan Barangay San Antonio Ogbon, Nabua, CSur iyo an responsable sa paghanap sa biktima puon na mag-hagad nin tabang an Lolahon sa saiya kan Agosto 5.
Sa inbestigasyon ni Lavilla an biktima si Trecia May Samson, doce anyos, igwang ka-chat sa social media asin sa osip kan Lolahon an biktima naghale sa saindang residencia alas 9:00 nin banggui na napag-araman nag-angkas sa motorsiklo kan sarong lalaki.
Alas 4:00 nin maagahon kan Agosto 5 igwang nakaheling an biktima na may kainuman sa Bato, Camarines Sur.
An nag-osipon sa saiya an pigbistong si ‘‘Pulong’’ na an huring kaibanan kan biktima iyo si Ricky Ebonita, 29 anyos.
Sa saiyang hararum na inbestigasyon pigtukdo sa sarong lugar alagad nagkua siya nin pag-iribang tanod asin kapupulisan na pigsusog sa Brgy. Bustrac, Nabua kan Agosto 10 nin aga. Digdi nakua sa kaduotan patos nin sako mientras na nagrurugnas na an bangkay.
Mga ala 1:20 nin maagahon kan Agosto 11 pigsuko sa MPS Nabua an suspechadong si Ebonita kaibanan an sarong jail guard kan BJMP.
Mientras na nagkukunducir nin inbestigasyon sa suspechado biglang inagaw si 9MM caliber ni Major Divino Pelia, an COP kan MPS Nabua asin digdi na nagtapos an buhay kan suspechado kan badilon man kan sarong pulis.
Kinumfirmar pa kan jefe de pulicia na si Ebonite nag-aatubang pa nin sarong casong pang-aabuso na pigreclamo kan nakaagi pa sanang Agosto 1, 2021. (dpa)