Apat na opisyal kan PNP sa Bicol, inokag

Apat na mga opisyal kan PNP sa Bicol an kabali sa sarabay na inokag kan bagong regional director sa ginibong simpleng ceremonia sa Camp BGen Simeon Ola, Ciudad nin Legazpi kan Enero 5, 2024.

An turnover of office ceremony pinangenotan ni PBGen Andre P. Perez Dizon, Acting Regional Director, PRO5, na kinababalihan ninda PCol. Rayan Ador iyo an bagong madedestino bilang Provincial Director kan Catanduanes PPO, karibay ni PCol Benjamin Balimbing Jr. na iyo na an bagong jefe kan Regional Information Communication Technology Management Division asin PCol Erwin Lanuzga Rebellion iyo na an nag-asumir kan posisyon bilang bagong City Director kan Naga City Police Office, karibay ni PCol Nelson Pacalso, si Pacalso destino na bilang bagong Regional Personnel Holding and Accounting Section mientras naghahalat nin bagong destino.

An apat na mga opisyal kan PNP iyo an premirong mga inukag kan Acting RD mantang piglalaoman na igwa pang isusunod na mga provincial directors asin jefe kan Municipal Police Stations.

Normal na sa organisasyon an pagribay-ribay nin posisyon, sabi pa ni Dizon.

An riribayan nin posisyon plano na kan bulan nin Deciembre 2023 alagad isinibog mientras na prayoridad kan PNP Bicol iyo an pagseguro kan paz y orden sa pagsabat kan Pasko asin Bagong Taon.

Col. Erwin Lanuzga Rebellon bagong City Director kan Naga City Police Office nagpapahayag sa media interview kan saiyang mga programa sa Naga PNP. (NCPO)