Apat na spillway sa CSur apektado kan tubig baha

Nagkaperang mga spillway sa barangay sa Camarines Sur nilantopan nin tubig baha asin dai maagihan nin mga vehiculo huli kan nagkapera nang aldaw na mga pag-uran.

Sa natipon na report kan Environment, Disaster Management and Emergency Response Office (EDMERO) Camarines Sur an mga lugar na apektado kan tubig baha asin dai maagihan nin vehiculo iyo an Spillway sa Poblacion, Lupi, CSur; sa barangay Bahi, Garchitorena, CSur; barangay Bahao Spillway, Garchitorena, CSur; Sitio Capilla, San Fernando, Siruma, CSur pueding agihan alagad bawal sa light vehicle.

Sagcod kan Martes, Enero 17, 2023 binabantayan kan mga kanya-kanyang MDRRMO kan lokal na gobierno nganing maseguro na mayong magfuersang magbalyo asin maibitaran an aksidente sa tubig.

Segun sa MDRMMO kan LGU Lupi, CSur an dai puedeng agihan nin mga vehiculo sa saindang spillway iyo an mga lugar kan Poblacion-Barera; Poblacion-San Pedro; asin San Jose Alanao-Pulantuna mantang an mga ‘‘passable’’ iyo an Napolidan – San Ramon asin San Pedro – San Rafael.

Aga kan Martes, Enero 17, 2023 nagpaluwas nin memorandum si Alcalde Marilyn Co kan Caramoan, Camarines Sur na suspendiron an klase sa gabos na level kan pribado maging public schools asin man an LGU Sipocot, Camarines Sur, Libmanan, Lagonoy, Caramoan, Siruma, Presentacion asin Garchitorena nagpaluwas man nin kaparejong memorandum, mantang apektado na an saindang lugar kan tubig baha, alagad kan Miercules buelta na sa mga klase. (dpa)

Sa walang retrato Brgy Bahi, Garchitorena, CSur spillway asin sa Poblacion, Lupi, CSur spillway dai maagihan vehiculo huli kan tubig baha. (MDRMMO LGUs Garchitorena asin Lupi, CS)