APEC dapat ibalik sa Aleco

Padagos na nagkakalap nin pirma an Multi-Sectoral Stockholders Organization (MSSO) sa Albay sa saindang pigtutulod na signature campaign sa ribo-ribong konsumedores kan Albay Power and Energy Corporation (APEC) nganing huroton sa Department of Energy, Energy Regulatory Commission, asin sa National Electrification Administration na dapat ibuelta giraray sa manijamiento kan Albay Electric Cooperative (ALECO) sa tahaw kan nangyayaring ‘‘mismanagement’’ sagcod nagparalangkaw an tarifa sa kuryente kan pribadong korporasyon.


Si Engr. Virgilio Perdigon Jr. Secretary General kan MSSO nagpahayag sa Bicol Mail na kinakaipuhan ninda an diez mil na pirma kan konsumedores nganing isumiter sa mga ahencia de gobierno an saindang petisyon para sa maninigong aksyon.


Sagcod kasuodma igwa nang 3,300 na konsumedores an nagpirma sa petisyon sa paagi kan online asin offline.


An saindang mga reclamo kinakabalihan na puon mag-take over an APEC kan 2013 dai narealisar an mga pangako na papakarhayon an serbisyo alagad kabaliktaran mas lalong nagruro an apektado iyo an maabot sa 205 mil na konsumedores sa tolong congressional district kan Albay.


Kabale sa nagpalyar na mga pangako na babayadan ninda an dating utang na P4 bilyon kan dating ALECO alagad nagdoble an obligasyon mala ngani nag-abot na sa P8 bilyon; perming nagkakaigwa nin mga brownout, inaabot nin apat na bulan an ‘‘restoration’’ kan kuryente kun nagkakaigwang calamidad mantang kan panahon kan ALECO halawig na an apat na semana; nagpalangkaw nin cuatro pesos kan singil sa tarifa sa kuryente; ilegal na mass disconnection nin serbisyo nin kuryente kun hababaon an koleksyon sa sarong barangay envez na dapat si mga nagbabayad sa tamang panahon kan electric bill dai dapat idamay sagcod na natao sana nin limang aldaw na plaso na bayadan an morosidad nganing dai putolan nin kuryente.


An paliwanag kan APEC an biglaan na paglangkaw nin cuatro pesos sa tarifa huli kan manipis na suplay nin kuryente hale sa saindang power supplier mantang halangkaw an presyo kan pigbabakal nindang suplay sa WESM.


Sa petisyon kan MSSO, sinabi pa ni Engr. Perdigon saindang pig-suhestiyon sa tolong ahencia de gobierno an nagkaperang mga solusyon, dapat temporaryong padalaganon muna kan Albay LGU sa laog nin duwa hasta sa tolong taon an Aleco, nangyari na ini sa Ciudad nin Olongapo na igwang base legal; magnombra nin interim director na representado an manlaen-laen na sektor; asin coop-to-coop partnership na igwa nang ibang cooperativa nin electricidad an nagpapangako na matabang nganing makabangon an manijamiento kan Aleco.


Sainda pang tinutulod na dapat 24/7 sa publiko an record asin seguradohon na mayong tinatago.


Nangyari na an pagbagsak kan Aleco huli sa isyu sa kurapsyon alagad kun 24/7 babantayan kan Albayano malilikayan an problemang ini, sabi pa ni Perdigon. (dpa)