APEC nagbalga sa kasunduan sa ALECO
Saro naman na petisyon an nakatalaan isangat sa Department of Energy (DOE) kan sarong organisasyon nin consumedores nin kuryente sa Albay contra sa manijamiento kan Albay Power and Energy Corporation (APEC) huli kan pagbalga sa concessions agreement ninda sa kan dating Albay Electric Cooperative (ALECO).
Ini an pigbuyagyag ni James Casilihan, lider kan ALECO Multi-Sectoral Stakeholders Organization (AMSSO) kasunod kan enot na pigsangat na reclamo sa Energy Regulatory Commission ni AKB party list Congressman Alfredo Garbin na nagcucuestion kan paliog na cuatro pesos na dugang na singil sa tarifa sa kuryente cada kilowatt hour.
Hagad kan AKB sa ERC na dapat malinawan kun tama o overcharging an pigsisingil na dugang na P4.00 na tarifa.
An paliwanag kan manijamiento kan APEC kun halangkaw an saindang pigpatong sa tarifa sa kuryente huli ta mahal man an presyo kan saindang binabakal na suplay nin kuryente sa WESM.
Sinabi kan AMSSO an saindang abogado na si Atty. Bartolome Rayco nag-aandam na kan petisyon na malinaw na nagbalga sa concessions agreement an APEC sa pagpalyar na makabayad sa dating obligasyon finansyal kan ALECO na labi sa P4 bilyon.
Sinabi ni Casilihan sa sinambit na kasundoan nag-aasegurar an manijamiento kan APEC na babayadan an dakulang mga kautangan kan dating manijamiento asin kabale sa mga testigo iyo si Obispo Joel Baylon.
An record nagpapaheling nadoble an kautangan kan pribadong korporasyon na nag-aabot na sa P8 bilyon apesar na nagpalangkaw nin tarifa maluya pa an serbisyo apektado an maabot sa 200 mil na consumedores sa tolong congressional district kan Albay.
Dinagdag pa ni Casilihan na huli kan mga pagbalga sa sinambit na agreement dapat ibuelta na sa dating manijamiento kan ALECO asin bawion sa pribadong korporasyon na sadiri kan San Miguel Energy Corporation.
An ALECO iyo an may ligal na franquicia alagad mayo kaini an presenteng manijamiento.
An AMSSO madulok sa Bikolanong Undersecretary Wimpy Fuentebella kan DOE nganing makatabang sa pagresolber kan reclamo kan consumedores. (dpa)