APRUBADO NA SA KOMITE: KSBK nagsusuporta sa bill gibohon an BSKE sa 2026

An Kapisanan ng Sangguniang Barangay Kagawad (KSBK) sa Ciudad nin Naga nagsusuporta sa House Bill 10344 na pinag-gigilid an 2025 Barangay asin Sangguniang Kabataan (BSKE) elections envez gibohon ini sa Oktubre 2026.

Ini an mga pahayag sa Bicol Mail ni KSBK President Jhessa Ador matapos aprubaran kan House Committee on Suffrage and Electoral Reforms na padreno si Camarines Sur 2nd district Congressman LRay Villafuerte na kun idagos an pirilian kan BSKE sa 2025 magiging duwang taon an saindang termino matapos manggana kan Oktubre 30, 2023.

Saiyang sinabi na mayo sindang naheheling na maraot huli ta kun duwang taon dakulang posibilidad na si saindang naka-programang proyekto dai marerealisar mantang apektado an saindang konstituentes nin barangay.

Kun mapapalawig nin sarong taon an saindang termino mahahaman an nakatalaan na mga proyekto nganing mapakinabangan sa barangay, sabi pa ni Ador.

Igua nang naenot na resolusyon an saindang organisasyon Kapisanan ng mga Barangay Kagawad sa Pilipinas (KBKP) sa pamamayo kan saindang national President na si Michael Mayol. An resolusyon yaon na sa congreso na pusog nagsusuporta sa propuestong bill.

Si Ador, iyo an national treasurer kan saindang organisasyon nagsabi pa na base sa saindang orolay dapat cada Barangay Council mapasar nin resolusyon na naghuhurot sa congreso na gibohon giraray tolong taon an saindang termino.

Sinabi kan lehislador na contra sa 1987 constitution asin 1991 Local Government Code na pinagpapako sa tolong taon na termino.

Kaibanan ni Villafuerte sa pagpadreno kan HB 10344 iyo sinda Camarines Sur 5th district Congressman Migz Villafuerte asin Bicol Saro party-list Congressman Brian Raymund Yamson.

Napag-araman maging an iba pang Liga ng mga Barangay sa Bicol nagsusuporta sa propuestong bill kan tolong Bicolanong mga lehislador. (DPA)