Art exhibit, book launch ginibo sa Partido
Ni Sonny Malate
Lagonoy, Camarines Sur --- Ginibo an pinakaenot na art exhibit - may titulong Colors of Life - sa banwaan na ini asin book launch kan sarong local author. Ini sarong joint project kan Local Government Unit (LGU) kan Lagony asin United Visual Artists in Partido (UVAP).
An librong LAGONOY (Pangalagkalag Series) sarong katiriponan nin mga essays, sinurat kan Lagonoyon na si Atty. Christian E Rivero. Ini naglaladawan kan mayaman na cultura asin realidad sa comunidad sa magayon na banwaan na Lagonoy, sa paghiling asin paghimate kan sarong aki kan Lagonoy.
An book launch kan libro kan huben na abogado ginibo sa Lagonoy Covered Court mantang an tolong aldaw na art exhibit piglatag sa lobby kan municipal hall. Ini maogmang pig-atendiran kan mga oficiales local, mga bisita asin mga Lagonoyon asin residentes kan pagtaraid na banwaan.
Si Atty. Rivero nakabase sa Metro Manila mantang siya conectado sa DepEd Central Office. Cada vez na may importanteng mga oficial o personal na lakaw, siya minapuli sa Bicol. Digdi niya orug na namamate an kagayonan kan banwang ginikanan.
Si Rodge Merabil, presidente kan UVAP, dakula an pag-apreciar asin pasasalamat sa LGU sa paagi ni Alkalde Delfin (JB) F. Pilapil III asin Bise Alkalde Jerry Jake R. Remoto saka pag-iriba sa Sangguniang Bayan sa oportunidad na pigtao sa saiyang grupo. An UVAP naorganizar pa sana kan Enero ngonian na taon asin ini an primerong art exhibit kaini sa Lagonoy.
An grupo compuesto nin mga senior asin huben na visual artists na may hararom na passion sa arte. An iba sa huben na visual artists mga estudiantes asin enot nang nakabale sa art exhibit sa Goa asin ciudad nin Naga. Kadaklan man sa sainda mga ganador na sa mural asin ibang art competition.
Segun ki Merabil, hasta 15 sa 28ng miembros kan UVAP an nagparticipar sa art exhibit na open theme. An mga piyesa nabakal sa rasonableng presyo. Nag-acceptar man nin commission work an mga miembros sa mga nagdalaw na art patron.
Manonotaran na an LGU kan Lagonoy sustenido sa pagtulod kan kagayonan kan comunidad. Katakod kaini, an Samhod Festival digdi an pira nang taon na piglalatag sa banwaan tanganing irokyaw an cultura, arte, musica, sports, kakanon asin turismo digdi.
Maroromdoman man na pirang taon ta an nakaagi, an pig-oorgulyong aki kan Lagonoy, international artist Pancho Piano, an nagkaigua nin art exhibit sa mismong venue kan art exhibit kan UVAP. Durante kan exhibit nahiling an mga pamlbihirang piyesa ni Piano.
Si Piano an padagos na pigmimirar na inspirasyon kan mga visual artists bako sana sa Partido Area kundi maging sa ibang rona kan nacion.
An may mahoyong boot na de-calibreng Maestro kan Arte an dae nalilingaw kan saiyang dagang ginikanan. Paminsan minsan, siya minauli sa Bicol para sa katoyohan dapit sa arte asin personal na bagay.
Mientrastanto, pigbanggit kan pamayo kan UVAP na sa 2025 Samhod Festival liwat magkakaigua sindang art exhibit sa Lagonoy. Mas dakol na miembros an itatampok asin mas papalawigon an periodo kan exhibit, dagdag ni Merabil.
Commentaires