Arte nag-aarab-adab ngonian na tag-init

Kasabay kan init kan panahon, nag-aarab-adab man an eksena kan arte sa distrito kan Partido. Tampok an manlaenlaen na arts genre, ini sarong significanteng celebrasyon  kan arte, cultura asin espiritu kan entrepreneurship digdi.

Sa banwaan kan San Jose, sa Mayo 24 asin 25 nakatalaan gibohon an Arab-adab Arts Festival 2025. Lugar na lalatagan kaini iyo an laguerta kan San Jose Partido Tourist Rest Area sa Sitio Talisay, Dolo sa banwaan na ini.

Obheto kan actividad iyo an maitampok an magayon na arte, cultura asin native  products na mayaman an distrito. Siring man, tanganing orug na maparambong an talento  kan mga local artists digdi.

Sarong colaborasyon entre kan local na gobyerno sa liderato ni Alkalde Jerold B.  Peña asin Partido Artists Group (PAG), sa pamamayo ni Dr. Lourdes L. Nieva, ini paparticiparan kan mga talentadong local artists, negociantes asin mga representantes kan cooperativa asin gobyerno, kairiba an mga municipal tourism officers.

Segun ki David Con Monserate Rivero,  Vice Chair kan PAG asin famosong vlogger kan Let’s Go Partido, man- iba-ibang bibo asin macolor na actividades an ilalatag sa venue na harani sa baybayon kan Lagonoy Gulf asin Partido Boulevard.

Kairiba digdi iyo an visual arts display kan PAG asin United Visual Artists in Partido (UVAP) sa pamamayo ni Rodge Merabil. Yaon  man an on-the-spot charcoal painting, portrait sketching, caricature, chalk painting asin pag tattoo.

Malatag man nin mga native/indigenous products, mga productong kakanon asin mga sari-saring items an local entrepreneurs, Negocio Center asin iba pa. Piglalalaoman an dakol na katawohan an madagsa kaini.

Segun pa ki Rivero,  may mga libro kan local authors  asin mga ladawan hale sa mga photo artists an ididisplay,  Magkakaigua man nin open mic session kairiba an local performers asin literary writers. 

Maroromdoman na kan Abril, nagkaigua nin art exhibit, mural painting asin on the spot painting competition sa banwaan kan Lagonoy durante kan Samhod Festival. 

Kan Mayo 15 hasta 19, nagkaigua man art exhibit an UVAP sa San Jose. Sa Junio 13 sagkod 21, saro pang art exhibit an gigibohon kan kaparehong grupo sa banwaan kan Goa katakod kan pintakasi ni San Juan Bautista.

Durante  man kan okasyon sa Goa, magkakaigua nin tigsik asin rawitdawit competition. Dagdag pa digdi an trade fair kan DTI na nagtutulod kan mga native/indigenous products.

Mientrastanto, an PAG asin UVAP may mga nakalinyada pang art events sa mga masurunod na bulan. Nasa initial na plano na man kan duwang grupo an paghimo nin sarong art gallery sa tabang kan sarong local na gobyerno.

Si Rivero asin pag-iriba naglalaom na sa sararong esfuerzos kan saindang grupo  asin suporta kan gobyerno asin privadong sector, padagos  an activo asin makolor na arte sa comunidad

Mga art piece tampok sa Arab-adab Arts Festival. (Photo Let’s Go Partido!)