Arte para sa Patrona kan Bicolandia

Ni Sonny Malate

Apwera sa simbahan, an katiriponan kan mga Bicolanong may passion  sa linya nin cultura asin arte an sibot  ngonian na Septiembre sa mga actividades katakod sa kafiestahan ni Nstra. Sra. de Peñafrancia, an Patrona kan Kabikolan.

An Salingoy Art Group (SAG), pusog, midbid asin activong katiriponan nin mga local visual artists na nakabase sa ciudad nin Naga, an nag-organizar kan primerong art fair na konektado sa pintakasi ni Ina.  Ini may titulong PAGROMDOM: “Kabikolan, Noon at Ngayon'', pinoonan kan  Septiembre 8, asin matatapos sa huring aldaw kan bulan na presente.

An art fair ginigibo sa VGallery and Museum, M.T. Villanueva Ave., ciudad nin Naga. Ini participado nin doceng art group hale sa Camarines Sur, Sorsogon, Masbate asin Catanduanes.

Kaibahan pa man an mga visual arists gikan sa Tanay, Rizal na mga taga Bicol man. Sa laog kan periodo kan art fair mahihiling an mga piyesa kan mga participantes sa gallery

An mga piyesa na an kadaklan naglaladawan ki Ina bukas para sa mga art collector sa rasonableng presyo.

Segun ki international artist Pancho M. Piano, Chair kan SAG asin curator kan art event,  an paggibo kan art fair nagpapahiling kan hararom na pagtubod kan mga Bicolano sa Patrona kan rehiyon.

Ini okasyon man kan pagromdom asin pagreconusir kan mga pambihirang contribucion kan mga Bicolanong artista na naenot na sa ikaduwang buhay, sa arteng Bicol.

Sinda Roberto Villareno kan Magarao, Alfonso Oliva kan ciudad nin Iriga asin Elmer Salvosa kan Calabanga an pigduholan kan PAGMIDBID Award (Posthumous) durante sa pagbukas kan art fair.

Presente bilang guest speaker iyo si Dr. Danilo M. Gerona, bistadong Bicolano historian. Si Gerona an nagheras kan saiyang kabatiran dapit sa agi-agi kan arte sa Kabikolan kan enot na panahon.

Mientrastanto, pigcomfirmar ni Piano na tubong barangay Mangogon, Lagonoy, na siya sarong devoto ni Ina. Ini an manonotaran sa dakolon niyang mga obra na naglaladawan kan imahen kan Patrona kan Bicolandia digdi sa Bicol, Kamanilaan asin ibang nacion.

Pigsaysay man kan de calibreng artista na sa kada vez na siya minauli hale sa Metro Manila pasiring sa Bicol, minasungko siya ki Ina sa Metropolitan Cathedral o Basilica Minore tanganing magpamibi, magpasalamat asin magngayongayo.

Segun saiya, sa dakol na veces dakolon man na biyaya asin oportunidad an itinao sa saiya ni Ina. Saro na digdi iyo an dakulang art project niya sa Pebrero 2025: mural art para ki Presidente Nelson Mandela kan South Africa.

Si Piano gikan sa sarong middle income na pamilya sa coastal na barangay sa Lagonoy. Hale sa simpleng lugar, siya naglapigot asin sa presente saro nang dakolang pangaran sa international art community.

Sa mga hubenes ngonian, an saiyang nakakainspirar na hulit: bakong ulang an pagtios para marealizar an pangaturogan. Magtiyaga, magpursigi asin manteniron an karahayan nin boot.

Apwera kan art fair sa VGallery and Museum, may one man show pa man si Piano sa Basilica Minore ngonian,  may titulong “Handog ki Ina.”

An Bicolanong international artist Pancho M. Piano durante sa pagbukas kan 1st Bicol Art Fair sa VGallery and Museum (Photo- SAG -Partido)