ASF lakop na sa Bicol

Apektado na an anom na mga provincia sa Kabikolan kan African Swine Fever (ASF) alagad igwa na sanang 58 mga barangay na dai pa apektado kan virus sa hayop.


An Masbate iyo an pinakahuring provincia sa Bicol na tinamaan kan ASF matapos makumfirmar kan National Meat Inspection Service (NMIS) na nagpositivo na sa virus sa hayop an ataman na na mga hayop ni Alcalde Arturo Virtucio kan banwaan nin Aroroy.


An Department of Agriculture (DA) sa Bicol sa pamamayo ni regional executive director Rodel Tornilla tolos man nagsugo sa saiyang mga technical team nganing aramon an kamugtakan kan mga apektadong lugar sa Masbate.


Sa saindang report pigpahayag na maabot na sa 58 zona sa mga banwaan an apektado na kan ASF mantang nag-aksyon an LGUs nganing dai na mag-ulakit sa ibang inaataman na orig sa barangay pigdepopulate an mga hayop para dai na magparalangkaw an caso.


An DA igwa nang nakatagamang fondo nin Ph5,000 sa cada payo kan orig na gagadanon bilang kumpensasyon sa paraoma.


An ASF sa Bicol nagpuon kan Febrero 2020 sa Bombon, Camarines Sur asin naglakop sa iba pang mga banwaan asin sa iba pang provincia kan rona.


Labi na sa Php 63,000 an na-itaong tabang kan ahencia sa mga hog growers na apektado kan virus sa hayop.


An padagos na paglangkaw kan caso kan ASF sa Bicol iyo man an nakaka-apektar sa suplay kan karne sa mga mercado na nagiging dahilan sa paglangkaw kan presyo.


An mga lokal na gobierno dawa na ngani nagbugtak nin Animal Checkpoint alagad dai man naging solusyon nganing makontrol an paglangkaw kan caso.


Sinabi kan DA na dapat mag-cooperar digdi bako lang an mga ahencia de gobierno maging an mga consumedores, negosyantes asin publiko na isombong tolos an mga ilegal na viajero nin trak-trak na orig na iyo an nagiging dahilan kan paglakop kan virus. (dpa)