top of page

ASF outbreak pigdeclara sa sarong banwaan kan CSur

SARONG banwaan kan primer distrito kan Camarines Sur pigdeclara na outbreak huli sa paglangkaw kan casong african swine fever (ASF) sa ataman na orig mantang padagos man naka-monitor sa pagtaraig na banwaan an mga awtoridad contra sa virus sa hayop.


Si Lovella Guarin, regional information officer kan Department of Agriculture (DA) nagpahayag na an Ragay, Camarines Sur iyo an apektado kan ASF. Sa pinakahuring listahan nag-total na sa 102 na hayop an ginaradan na tolos man tinalbong sa daga nganing dai na mag-ulakit sa iba pang mga barangay.


Apat na mga barangay an apektado na kinababalihan kan Baya, Binakang Proper, Fort junction North asin Laguio. Si mga orig na pigdudahan sa ASF tolos nagkaigwa nin blood collection asin sa resulta kan laboratory positivo sa helang sa hayop na kabali sa mga pig-depopulate.


Sinabi pa ni Guarin an 102 na hayop piggaradan asin tinalbong sa daga nganing dai na makaulakit.


An aksyon kan DA Bicol iyo an pagbugtak nin mga check point surveillance sa mga viajero kan orig paluwas man o palaog sa banwaan kan Ragay.


Igwa na sana nin lugar an viajero nganing si saindang nabakal na hayop dadarahon na sana sa delivery truck.


Quince mga paraoma an apektado kan outbreak alagad kun sinda rehistrado sa Philippine Crop Insurance Corporation o PCIC Swine Industry Insurance puedeng makakua nin insurance claim.


An swine industry Insurance Program katuwang kan DA bilang “Bantay ASF” sa mga barangay nganing makabawi sa kalugihan sa pag-atamang hayop para makabangon an industriya sa pag-atamang orig.


Kan enot kan magbongkaras an ASF sa Bicol an DA nagtataong P5,000 sa apektado kan virus alagad ngunian yaon na sa PCIC.


An maogmang bareta segun pa sa DA mayo naman nin ibang mga banwaan na may caso kan virus sa hayop. (dpa)

Comments


bottom of page