ASF, pagturador nakaka-apektar sasuplay nin karning orig sa mercado

An City Veterinarian Office kan lokal na gobierno kan Ciudad nin Naga nagbuyagyag na saro sa nakaka-apektar sa kakulangan nin suplay kan karning orig sa Naga City People’s Mall (NCPM) iyo an mga pagturador nin hayop na inaangkat digdi sa Naga asin Camarines Sur nganing darahon an buhay na orig sa Metro Manila.

Afuera pa kaini, iyo an nangyaring ginaradan na ribo-ribong orig huli kan paglaog kan African Swine Fever (ASF) matapos i-depopulate kan Department of Agriculture (DA) asin National Meat Inspection Service (NMIS) nganing dai na maglakop an virus sa hayop.

Ini an mga pahayag ni Dr. Julius Elad. Jr., jefe kan CVO sa City Hall mantang nagrereclamo na an mga paratienda nin karning orig sa NCPM nin huli ta nagkulang-kulang an saindang suplay asin dificil pang makahanap nin buhay na orig.

Kinumfirmar ni Market Supt. Ramon Florendo kan NCPM an padagos na pagkulang-kulang nin karning orig sa meat section mantang kaipuhan ngunian na panahon nin Pasko asin naglalangkaw na an presyo sagcod na puedeng magsakat pa sa sobra sa P300 an kilo.

An lokal na gobierno kan ciudad mayo man nin ordinansa nganing bawalan maglaog an mga pakturador nin buhay na orig mala ngani igwa pang kasusyo nganing maghanap nin pinapabakal na hayop sa barangay.

Kan panahon na nagkaigwa nin ASF sa hayop sa Ciudad nin Naga temporaryong pigsara an Naga City Slaughter House para sa bubunoon na orig asin iba pang pagtaraig na mga banwaan huli kan epekto kan virus sa hayop.

Nagbukas sana an bunoan hayop sa barangay Del Rosario, Naga sarong bulan matapos magkulpa an ASF alagad naglakop man sa iba pang mga banwaan kan Camarines Sur.

Dawa saen na mga mercado sa Camarines Sur entero man kapa-kapa an negosyante mantang sagcod sa ngunian kulang pa nin suplay. (dpa)