ASF puedeng magbalik liwat, patanid kan DA

An Department of Agriculture sa Bicol nagpatanid dawa mayo nang caso kan African Swine Fever (ASF) alagad dai man na-ngangahulogan libre sa virus an ataman na hayop mantang sagcod sa ngunian mayo pang bakuna laban sa ASF.

Bulan pa nin Hulyo 2021 zero na sa ASF sa ataman na orig alagad kan nakaaging bulan may nagbutwang sarong caso sa Sorsogon na tolos man nakontrol an virus nganing dai na maglakop sa ibang mga banwaan.

Huli kaini, sinabi ni DA regional spokesperson Emily Bordado kinakaipuhan seguradohon kan mga paraoma asin hog raisers na perming malinig an tangkal asin sa klase kan mga binabahog sa sainda.

Sagcod sa ngunian dai pa nakaka-inbento nin bakuna laban sa ASF bakong arog kan coronavirus disease (Covid-19) na padagos na an ginigibong vaccination sa mga tawo.

Plano kan DA na adaptaron an ginigibo sa ibang nasyon na clustering backyard an pag-ataman nin mga orig alagad padagos pang inaadalan kun puedeng iimplementar sa mga barangay sa satong nasyon.

Dawa zero na sa caso sa virus sa hayop sagcod sa ngunian halangkaw pa an presyo kan karneng orig sa mercado sa dahilan na nagkukulang pa an suplay kan bubonuon na hayop.

Saro sa programa na ginigibo kan ahencia na matabangan an paraoma na apektado kan magkaigwang halalangkaw na caso kan ASF nganing matawan sinda nin atamanon na piglets asin mapalangkaw an produksyon kan suplay kan karne sa mga mercado.

Maging sa negosyante na may darakulang piggery igwang programa an gobierno nganing makautang sinda sa bangko. (dpa)